भीरकोटमा सातौं राष्ट्रपति रनिङ शिल्ड प्रतियोगिता सुरू

भीरकोटमा सातौं राष्ट्रपति रनिङ शिल्ड प्रतियोगिता बिहीबार देखि सुरू भएको छ। भीरकोट खेलमैदान , बयरघारीमा सुरू भएको प्रतियोगितामा  १२  वटा सामुदायिक  विद्यालय र ५ वटा संस्थागत विद्यालय गरि १७ वटा विद्यालयका   विद्यार्थीहरूले  ४५ पदकका लागि प्रतिस्पर्धा गर्नेछ्न्। 

प्रतियोगितामा ट्रयाक तर्फ ८, फिल्डतर्फ ५ र भलिबल र कबड्डीगरी १५ वटा खेल प्रतियोगिता हुने राष्ट्रपति रनिङ शिल्ड प्रतियोगिता २०८२ व्यवस्थापन समितीका  संयोजक एवं नगर प्रवक्ता दिपेन्द्र के.सी. ले जानकारी दिनुभयो। विद्यार्थीहरूको मार्च पास  र भाग्योदय मा.वि. को पञ्चेबाजा सँगै सुरू भएको प्रतियोगिता राष्ट्रपति रनिङ शिल्ड  संचालन कार्यविधी अनुसार हुने शिक्षा शाखा प्रमुख विष्णु बहादुर भट्टराईले जानकारी दिनुभयो। उहाँका अनुसार प्रतियोगितामा करिब १ हजार जना विद्यार्थी खेलाडीको सहभागिता हुनेछ। 

प्रमुख प्रशासकीय अधिकृत लक्ष्मण लम्सालले विद्यार्थी र शिक्षकहरूलाई  विद्यार्थीको क्षमता र योग्यतालाई भरपुर सदुपयोग गरि खेल गतिविधिमा सहभागी हुन अनुरोध गर्नुभयो। खेलकुदले शारीरिक, मानसिक र संवेगात्मक विकास गर्ने भएकाले अनुशासित भएर खेलमा सहभागी हुन उहाँको सुझाव छ। 

नगर प्रमुख गोविन्द कर्माचार्यले खेलकुद प्रतियोगिता व्यवस्थित र अनुशासित तरिकाले संचालन गर्न सरोकारवाला सबैको सहयोग आवश्यक रहेको बताउनुभयो। उहाँले विद्यार्थीहरूलाई आफ्नो विद्यालय र  पालिकाको नाम राख्ने गरेर खेलकुदमा सहभागी हुन आग्रह गर्दै आगामी वर्ष क्रीकेट र फुटबल प्रतियोगिता पनि समावेश गरिने बताउनुभयो।

कार्यक्रममा बालोदय मा.वि. का  छात्र सुबोध रेग्मी, भाग्योदय मा.वि.   छात्रा कुसुम रेग्मी, पब्लिक एकेडेमी मा.वि. का प्रधानाध्यापक गिता रोका क्षेत्री, दहथुम मा.वि. का प्रधानाध्यापक तोयनाथ कोइराला, भीरकोट उद्योग वाणिज्य संघका महासचिव चोपनारायण श्रेष्ठ, राप्रपाका  हर्क बहादुर रोका, रास्वपाका  मीन बहादुर के.सी., एमालेका नगर कमिटी अध्यक्ष  हर्क गुरूङ , निवर्तमान नगर प्रमुख छायाराम खनाल, नेपाली काँग्रेस भीरकोटका सभापति याम प्रसाद अधिकारी , नेकपा एमालेका महाधिवेशन प्रतिनिधि विश्वनाथ अर्याल लगायतले शुभकामना दिनुभएको थियो।