पुतलीबजारको राष्ट्रपति रनिङ शिल्ड रोशनी माविको पोल्टामा

स्याङ्जाको पुतलीबजार नगरपालिकामा आयोजित आठौं राष्ट्रपति रनिङ शिल्ड प्रतियोगिताको उपाधि रोशनी आवासीय माध्यमिक विद्यालयले हात पारेको छ। रोशनी माविले लगातार तेस्रो पटक यो उपाधि जित्दै रनिङ शिल्ड नै आफ्नो पोल्टामा पार्न सफल भएको हो।

प्रतियोगितामा १९ स्वर्ण, ३ रजत र ४ कास्य पदक जित्दै रोशनी माविले सर्वोत्कृष्ट नतिजा ल्याएको हो। उपाधिसँगै विद्यालयले १५ हजार रुपैयाँ नगद, रनिङ शिल्ड, ट्रफी, मेडल तथा प्रमाणपत्र प्राप्त गरेको छ।

प्रतियोगितामा ५ स्वर्ण र १ रजत पदकसहित हिमालय माध्यमिक विद्यालय द्वितीय र २ स्वर्ण, ५ रजत तथा ३ कास्य पदक प्राप्त गर्दै स्याङ्जा माध्यमिक विद्यालय तृतीय भएको कुरा शिक्षा शाखा प्रमुख  बाबुराम बरालज्यूले जानकारी दिनुभयो।

द्वितीय र तृतीय स्थान हासिल गर्ने विद्यालयलाई क्रमशः १० हजार र ७ हजार रुपैयाँ नगदसहित ट्रफी, मेडल र प्रमाणपत्र प्रदान गरियो। साथै, विभिन्न विधामा उत्कृष्ट प्रदर्शन गर्ने विद्यार्थीहरूलाई पनि ट्रफीसहित पुरस्कृत गरिएको थियो।

पुतलीबजार नगरपालिका–१ स्थित मालेबगर खेलमैदानमा सम्पन्न उक्त प्रतियोगितामा भलिबल, एथलेटिक्सतर्फ विभिन्न दूरीका दौड, ट्रिपल जम्प, लङ जम्प, हाई जम्प, ज्याभलिन थ्रो, सटपुट तथा कबड्डी लगायतका १५ विभिन्न खेलहरू समावेश गरिएका थिए।

नगरभित्रका २४ वटा विद्यालयहरूबीच भएको यस प्रतिस्पर्धामा एक हजार दुई सय ८० जना विद्यार्थीहरूको सहभागिता रहेको थियो भने कुल ३० स्वर्ण पदकका लागि प्रतिस्पर्धा भएको थियो।

विजयी खेलाडी तथा विद्यालयलाई पुरस्कार वितरण गर्दै पुतलीबजार नगरपालिकाका नगर प्रमुख श्री तुलसीराम रेग्मीज्यूले खेलकुदले विद्यार्थीहरूमा आत्मविश्वास, नेतृत्व क्षमता र अनुशासन विकास गर्न महत्त्वपूर्ण भूमिका खेल्ने बताउनुभयो। उहाँले शैक्षिक ज्ञानसँगै खेलकुदमार्फत मानसिक र शारीरिक स्वास्थ्य सुदृढ बनाउनेतर्फ जोड दिँदै यस्ता प्रतियोगितालाई आगामी दिनमा पनि निरन्तरता दिइने प्रतिबद्धता व्यक्त गर्नुभयो।