भीरकोटमा विद्यार्थीलाई शैक्षिक सामग्री तथा पोशाक वितरण

मुक्तिनाथ विकास बैंकले स्याङ्जाको भीरकोट नगरपालिकाका विभिन्न विद्यालयमा अध्ययनरत विद्यार्थीहरूलाई शैक्षिक सामग्रीसहित विद्यालय पोशाक वितरण गरेको छ। बैंकले आधारभूत र माध्यमिक तहमा अध्ययनरत विपन्न तथा जेहेन्दार विद्यार्थीलाई लक्षित गर्दै कापी, कलमलगायत शैक्षिक सामग्री र ट्रयाकसुटसहितको पोशाक उपलब्ध गराएको हो। सामाजिक उत्तरदायित्व कार्यक्रमअन्तर्गत भीरकोट सामिप्य सदनको अगुवाइमा उक्त सहयोग वितरण गरिएको बैंकले जनाएको छ।

नगरपालिकाभित्रका आठ वटा विद्यालयका ४४ जना छात्र–छात्रालाई उक्त सामग्री वितरण गरिएको हो। यसअन्तर्गत दहथुम र भाग्योदय माध्यमिक विद्यालय, लक्ष्मी, सूर्यमुखी, बालवर्ष, पूर्ण दुर्गाभवानी आधारभूत विद्यालय तथा पब्लिक एकेडेमीमा अध्ययनरत विद्यार्थीहरूले सहयोग प्राप्त गरेका छन्। वडा नम्बर २ र ७ का विद्यार्थीलाई दहथुम माध्यमिक विद्यालयमा तथा वडा नम्बर ६ र ८ का विद्यार्थीलाई भाग्योदय माध्यमिक विद्यालयमा सामग्री हस्तान्तरण गरिएको थियो।

कार्यक्रममा सामग्री वितरण गर्दै मुक्तिनाथ विकास बैंक क्षेत्रीय कार्यालय पोखराका प्रमुख श्री बाबुराम ढकालज्यूले बैंकले विपन्न, जेहेन्दार र सामाजिक रूपमा अप्ठ्यारोमा परेका वर्गलाई निरन्तर सहयोग गर्दै आएको बताउनुभयो। उहाँले शिक्षामा पहुँच बढाउन यस्ता कार्यक्रम प्रभावकारी हुने कुरा उल्लेख गर्नुभयो। बैंकले विगतदेखि नै विद्यालय तथा विभिन्न सामाजिक संघसंस्थासँग सहकार्य गर्दै सामाजिक क्षेत्रमा योगदान पुर्‍याउँदै आएको छ। पछिल्लो समय स्थानीय सुरक्षा निकाय प्रहरीसँगको सहकार्यमा सूचना प्रविधि र सचेतनामूलक कार्यक्रमलाई समेत सहयोग गरिरहेको बैंकले जनाएको छ। बैंकले सामाजिक उत्तरदायित्वअन्तर्गत शिक्षा, स्वास्थ्य र खेलकुद क्षेत्रलाई प्राथमिकतामा राख्दै यस्ता कार्यक्रमहरू सञ्चालन गर्दै आइरहेको छ।