अर्जुनचौपारीमा रनिङ शिल्ड र शैक्षिक महोत्सवको उत्साह

स्याङ्जाको अर्जुनचौपारी गाउँपालिकामा तेस्रो राष्ट्रपति रनिङ शिल्ड तथा बृहत् शैक्षिक महोत्सव सोमबारदेखि औपचारिक रूपमा सुरु भएको छ। यहाँको वडा नम्बर १ स्थित पालिका खेलमैदानमा सुरु भएको यस प्रतियोगिताले गाउँपालिकाभरिका विद्यार्थीहरूलाई एकै ठाउँमा जोड्ने काम गरेको छ।

उद्घाटन कार्यक्रममा बोल्दै गाउँपालिका अध्यक्ष श्री प्रकाश तिवारीज्यूले खेलकुद र सिर्जनात्मक गतिविधि विद्यार्थीको नेतृत्व विकास र क्षमता उजागर गर्ने सशक्त माध्यम भएको बताउनुभयो। उहाँले प्रतिस्पर्धामार्फत प्रतिभावान खेलाडी पहिचान गरी उनीहरूलाई राष्ट्रिय तथा अन्तर्राष्ट्रिय स्तरसम्म पुर्‍याउने लक्ष्यसहित राष्ट्रपति रनिङ शिल्ड तथा शैक्षिक महोत्सव आयोजना गरिएको कुरा स्पष्ट पार्नुभयो।

कार्यक्रममा उपाध्यक्ष श्री सपना गुरुङज्यू, प्रमुख प्रशासकीय अधिकृत श्री युवराज अर्यालज्यू, वडा नं -१ का वडा अध्यक्ष श्री रण बहादुर थापाज्यू, पञ्चकन्या माध्यमिक विद्यालयका प्रधानाध्यापक जीतबहादुर थापा, शैक्षिक कार्यदल संयोजक प्रेमप्रसाद देवकोटा, शिक्षक नारायण काफ्ले, लाल केसी तथा विद्यार्थी प्रतिनिधिहरू दिपीका काफ्ले, चेन्ज मेकर क्लबका आकृती तिवारी, सिजन रोका र आयुस चापागाईं लगायतले आ–आफ्नो धारणा राख्नुभएको थियो।

महोत्सवअन्तर्गत मेमोरी टेस्ट, इन–आउट, ब्यालेन्स रेस, क्विक रेस्पोन्स, चम्चा दौड, म्युजिकल चियर, एकल नृत्य, डोरी तान्ने, हट पोट्याटो, वाटर रिले, रिले दौड, बोरा दौड, हाइजम्प, लङजम्प, ट्रिपल जम्प, शटपुट, कबड्डी, ज्याभ्लिन थ्रो, भलिबल, बिच भलिबल तथा विभिन्न दूरीका दौड प्रतियोगिता सञ्चालन भइरहेका छन्। प्रतियोगितामा ५० स्वर्ण, ५० रजत र ५० कास्य पदकका लागि प्रतिस्पर्धा हुनेछ।

तीन दिनसम्म चल्ने यस महोत्सवमा गाउँपालिकाभित्रका २९ विद्यालयका करिब एक हजार खेलाडीहरूको सहभागिता रहेको छ। प्रतियोगितामा सहभागी सबै खेलाडीको एक लाख रुपैयाँ बराबरको बीमा गाउँपालिकाले गरेको छ।