भाग्योदय स्वर्ण महोत्सव : समुदायस्तरबाट १४ लाख ५१ हजार  संकलन

भाग्योदय माध्यमिक विद्यालयले  माघ १२- १४ गतेसम्म तीन दिवसीय स्वर्ण महोत्सव मनाउने तयारी गरिरहेको छ। भीरकोटको वडा नं ६ मा अवस्थित यो विद्यालयमा नमूना विद्यालयको रूपमा पूर्वाधार विकासको काम समेत भैरहेको छ। २०३३ सालमा स्थापना भएको यो विद्यालय भीरकोटको उत्कृष्ट सामुदायिक विद्यालय पनि हो।

विद्यालयको मौजुदा कोषबाट खर्च नगरीकन समुदायको आर्थिक सहभागितामा स्वर्ण महोत्सवलाई शैक्षिक उत्सवका रूपमा मनाउन विद्यालयले  आर्थिक संकलनका लागि घरदैलो कार्यक्रम गरिरहेको छ। स्वर्ण महोत्सव तयारी र खेलमैदानका लागि जग्गा खरिद गर्ने उद्देश्यले विद्यालयले आर्थिक संकलन गरिरहेको विद्यालयका अध्यक्ष छायाराम खनालले जानकारी दिनुभयो। घरदैलो कार्यक्रमबाट श्रद्धापूर्वक स्वतस्फुर्त रूपमा सहयोग प्राप्त भएको र हालसम्म १४ लाख ५१ हजार  रूपैयाँ संकलन भैसकेको विद्यालयका प्रधानाध्यापक रेशमलाल खनालले जानकारी दिनुभयो। स्वर्ण महोत्सवमा  २० लाख रूपैयाँ खर्च गरिने  प्रधानाध्यापक खनालले बताउनुभयो।

स्वर्ण महोत्सव आयोजक मूल समारोह समिति एवं आर्थिक संकलन समितिका संयोजक समेत रहनुभएका अध्यक्ष खनालका अनुसार आर्थिक संकलनका लागि शिक्षक,समाजसेवी र जनप्रतिनिधिसहितको २ वटा समूह समूह बनाएर पुस ५ गतेदेखि समुदायमा परिचालन गरिएको छ। वडा नं ५, ६ र ७ मा घरदैलो भैरहेको उहाँले बताउनुभयो। ४ दिनको अवधिमा विद्यालयले करिब १५ लाख रूपैयाँ संकलन गर्न सफल भएको हो। आर्थिक संकलन अभियान अझै जारी छ।