ढापुकमा गाउँस्तरीय भलिबल प्रतियोगिता सुरू

जन एकता युवा क्लबकोे आयोजनामा भीरकोट ८ मा गाउँस्तरीय पुरुष भलिबल प्रतियोगिता सुरु भएको छ ।  ल्होसारको अवसरमा आयोजित प्रतियोगिताको उद्घाटन वडा नं. ८ का अध्यक्ष नन्दलाल खनालले गर्नुभएको हो । 

प्रतियोगिताको उद्घाटन गर्दै वडा अध्यक्ष खनालले विभिन्न परम्परागत तथा सांस्कृतिक पर्वले सामाजिक सदभाव र एकता कायम राख्ने बताउनुभयो । जन एकता बहुउद्देश्यीय सामुदायीक भवन र लाली गुराँस आमा समूहको भवन निर्माणमा नगरपालिकाले सहयोग गरेको भन्दै आगामी दिनमा सामाजिक तथा रचनात्मक कार्यमा वडा र नगरले थप सहयोग गर्ने प्रतिबद्धता जनाउनुभयो । 

कार्यक्रममा भीरकोट –८ वडा सदस्य मन बहादुर एसके, नेकपा एमाले भीरकोट नगर कमिटी सचिव पर्वत खम्चा मगर ,संस्थाका प्रमुख  सल्लाहकार मन प्रसाद गुरुङ, पूर्व अध्यक्ष तिल बहादुर गुरुङ , पब्लिक माविका प्रअ गीता रोका क्षेत्री,  क्लबका पूर्व सचिव रीबन कुमार विश्वकर्मा,  दहथुम प्रहरी चौकी प्रमुख मूक्त बहादुर खड्का लगायतले शुभकामना मन्तव्य व्यक्त गर्नुभएको थियो ।

क्लबका अध्यक्ष विजय गुरुङ्को सभापतित्वमा  सम्पन्न कार्यक्रमको संचालन क्लवका सचिव वीर बहादुर गुरुङ र स्वागत उपाअध्यक्ष टीका गुरुङले गर्नुभएको थियो ।  १८ टिमको सहभागीता रहेको उक्त प्रतियोगतामा प्रथम हुनेले नगद ८१ हजार शिल्ड मेडल र प्रमाणपत्र प्राप्त गर्ने छन्। त्यस्तै द्वितीयले ४५ हजार शिल्ड मेडल प्रमाण पत्र, तृतियले नगद ३० हजार र सान्तवनाले नगद २० हजार शिल्ड मेडल र प्रमाणपत्र प्राप्त गर्नेछन् । त्यस्तै विधा गत उत्कृष्ट हुनेले आकर्षण पुरस्कार सहित नगद मेडल र प्रमाणपत्रको व्यवस्था गरिएको छ ।