दभुङ ठाटी मा.वि. ले मनायो ७१ औं वार्षिकोत्सब 

भीरकोट नगरपालिकाको वडा नं ४ मा अवस्थित दभुङ ठाटी माध्यमिक विद्यालयले आफ्नो ७१ औं वार्षिकोत्सब मनाएको छ। वार्षिकोत्सब समारोहमा बोल्दै प्रमुख अतिथि संविधान सभा सदस्य एवं पूर्व सांसद राजु थापाले सामुदायिक विद्यालयको शैक्षिक गुणस्तर सुधार्न सरोकारवाला सबै एकजुट हुनुपर्ने बताउनुभयो। उहाँले अब सिपमूलक, व्यवहारिक र संस्कार शिक्षाको आवश्यकता रहेको बताउँदै विद्यार्थीहरूलाई देशप्रेम, राष्ट्रियता र देशमा भएका सम्भावनाहरूको बारेमा पढाउनुपर्नेमा जोड दिनुभयो।

विशिष्ट अतिथि एवं पूर्व विद्यार्थी धर्मराज ढुंगानाले विद्यालयका सबैखाले समस्याको समाधानका लागि पूर्व विद्यार्थीहरू एकजुट हुने प्रतिबद्धता व्यक्त गर्नुभयो। उहाँले विद्यालयमा सरस्वती मन्दिर निर्माण अभियानलाई सफल बनाउन पूर्व विद्यार्थीहरूलाई अनुरोध गर्दै मन्दिर निर्माण कार्य सुरू भएको घोषणा गर्नुभयो।

कार्यक्रममा एसइइ परीक्षामा उत्कृष्ट नतिजा ल्याउने विद्यार्थी र विषयगत नतिजा उत्कृष्ट भएका शिक्षकहरूलाई सम्मान गरिएको थियो। शिक्षकहरू प्रवीण काफ्ले र दिनेश ढुङ्गानालाई नगद पुरस्कारसहित सम्मान गरिएको थियो। गरिब, दलित, जेहन्दार विद्यार्थीहरूलाई १५ लाखको अक्षयकोषबाट छात्रवृत्ति र अतिरिक्त कृयाकलापका विजेताहरूलाई पुरस्कार प्रदान  गरिएको थियो। कार्यक्रममा खुमा फाउन्डेसनले सम्पूर्ण विद्यार्थीहरूलाई विद्यालय पोशाक वितरण गरेको थियो। यस्तै, खिलुङ कालिका एग्रोभेटले विद्यार्थी एवं अतिथीहरूलाई खाजाको प्रबन्ध गरेको थियो।

कार्यक्रममा विद्यालयका प्रधानाध्यापक सुवास गहतराजले विद्यालयको शैक्षिक, भौतिक र आर्थिक उपलब्धि समेटिएको प्रतिवेदन प्रस्तुत गर्नुभएको थियो। कार्यक्रममा विद्यार्थीका ७ वटा समुहले नृत्य र सांस्कृतिक प्रस्तुति देखाएका थिए। कार्यक्रममा भीरकोट नगरपालिकाका नगर प्रवक्ता दिपेन्द्र के.सी. र वालिङ नगर पालिकाका प्रवक्ता पदम गुरूङ्ले समेत शैक्षिक सफलताको शुभकामना  व्यक्त गर्नुभएको थियो। कार्यक्रम संचालन विद्यार्थीहरू गृष्मा के.सी. र सुशान्त गहतराजले संचालन गर्नुभएको थियो।