कुटपिटमा संलग्न  पाँच युवक पक्राउ

स्याङ्जाको पुतलीबजार नगरपालिका–१० सुम्रेखोला स्थित सिद्धार्थ राजमार्गमा रातिको समयमा स्कूटरमा सवार एक दम्पतीमाथि कुटपिट भएको घटनामा संलग्न पाँच जनालाई प्रहरीले नियन्त्रणमा लिएको छ ।

प्रहरीका अनुसार गए राति करिब १० बजे ग २४ प ५१०१ नम्बरको स्कूटरमा सवार पुतलीबजार–११ निवासी ४० वर्षीय पृथ्वीराज अर्याल र उनकी श्रीमती ४० वर्षीया संजिता नेपाल अर्याललाई बाटोमै रोकी कुटपिट गरिएको थियो । कुटपिटबाट दुवै जना घाइते भएका थिए भने घटनापछि आक्रमणकारी फरार भएका थिए ।

घटनाको सूचना प्राप्त हुनासाथ जिल्ला प्रहरी कार्यालय स्याङ्जाबाट खटिएको टोलीले तत्काल खोजतलास सुरु गरेको थियो । सोही क्रममा घटनामा संलग्न व्यक्तिहरूलाई माघ २४ गते नियन्त्रणमा लिन सफल भएको जिल्ला प्रहरी कार्यालय स्याङ्जाका सूचना अधिकारी तथा प्रहरी नायव उपरीक्षक प्रसन्न राज चौधरीले जानकारी दिनुभयो ।

पक्राउ पर्नेमा पुतलीबजार–१० सुम्रेखोला ओडारे बस्ने २८ वर्षीय ‘हाकु काले’ भनिने विनोद बहादुर अर्याल, ३० वर्षीय प्रविन राना, आरुपाटा बस्ने २५ वर्षीय रोहित गुरुङ, २७ वर्षीय अनुप राना तथा कान्छीबजार बस्ने २३ वर्षीय चेतनाथ अधिकारी (महेश) रहेका छन् ।प्रहरीले घटनास्थलबाट उनीहरूले प्रयोग गरेको ग ५ प १९१ र ग १० प ४७१३ नम्बरका दुई वटा मोटरसाइकलसमेत नियन्त्रणमा लिएको छ ।

घटनाबारे थप अनुसन्धान भइरहेको र पक्राउ परेकामाथि आवश्यक कानुनी कारबाही प्रक्रिया अघि बढाइएको सूचना अधिकारी प्रहरी नायव उपरीक्षक चौधरीले बताउनुभयो ।