स्याङ्जामा १४औँ राष्ट्रपति रनिङ शिल्ड सुरु, १० पालिकाका ९ सय खेलाडी प्रतिस्पर्धामा

स्याङ्जाको पुतलीबजार नगरपालिका–१ स्थित मालेबगर खेलमैदानमा १४औँ जिल्ला स्तरीय राष्ट्रपति रनिङ शिल्ड प्रतियोगिता शुक्रबारदेखि सुरु भएको छ। जिल्ला खेलकुद विकास समितिको आयोजनामा सञ्चालित उक्त प्रतियोगिताको उद्घाटन जिल्ला समन्वय समिति स्याङ्जाका प्रमुख श्रीप्रसाद जीटीले गर्नुभएको हो।

फागुन ३ गतेसम्म सञ्चालन हुने प्रतियोगिताको उद्घाटन गर्दै प्रमुख अतिथि जीटीले खेलकुद क्षेत्रको विकासका लागि सबै क्षेत्रको साथ र सहयोग आवश्यक रहेको बताउनुभयो। उहाँले खेलकुदले अन्तर्राष्ट्रिय स्तरमा राष्ट्रको पहिचान स्थापित गर्ने आधार तयार गर्ने धारणा समेत राख्नुभयो।

कार्यक्रममा जिल्ला शिक्षा विकास अधिकारी विश्वराज आचार्य, पुतलीबजार नगरपालिकाका शिक्षा प्रमुख बाबुराम बराल लगायतले पनि खेलकुदको महत्त्वबारे आ–आफ्ना भनाइ राख्नुभएको थियो।

प्रतियोगिता अन्तर्गत विभिन्न विधामा प्रतिस्पर्धा भइरहेको छ। एथलेटिक्स अन्तर्गत ट्र्याक तथा फिल्ड, मार्सल आर्टतर्फ कराते, तेक्वान्दो र उसु समावेश छन् भने भलिबल र कबड्डीमा छात्र तथा छात्रा दुवै तर्फका खेलहरू सञ्चालन भइरहेका छन्।

प्रतियोगितामा जिल्लाभरिका १० वटा पालिकाका करिब नौ सय खेलाडीको सहभागिता रहेको छ। यस प्रतियोगितामा व्यक्तिगत तथा समूहगत विधामा उत्कृष्ट प्रदर्शन गर्ने खेलाडीहरू बागलुङमा हुने प्रदेश स्तरीय प्रतिस्पर्धाका लागि छनोट हुने जानकारी जिल्ला खेलकुद विकास समितिका अध्यक्ष प्रकाश रेग्मीले दिनुभयो।