स्याङ्जामा भरुवा बन्दुकसहित एक जना पक्राउ

जिल्ला प्रहरी कार्यालय स्याङ्जाले भरुवा बन्दुक र त्यससँग सम्बन्धित सामग्रीसहित एक जनालाई पक्राउ गरेको छ। जिल्ला प्रहरी कार्यालय स्याङ्जा र प्रहरी चौकी विरुवा अर्चलेको संयुक्त टोलीले विशेष सर्च अपरेशन सञ्चालन गर्ने क्रममा स्याङ्जा जिल्लाको विरूवा गाउँपालिका–७ चित्लाङका ४६ वर्षीय केश बहादुर गुरुङलाई पक्राउ गरेको हो।

प्रहरीका अनुसार उनको घरमा लुकाइराखेको अवस्थामा एक नाले भरुवा बन्दुक, बारुद, छर्रा तथा क्याप जस्ता सामग्री बरामद गरिएको छ। उक्त सामग्री अवैध रूपमा राखिएको पाइएपछि प्रहरीले नियन्त्रणमा लिएको जिल्ला प्रहरी कार्यालय स्याङ्जाका सूचना अधिकारी प्रहरी नायव उपरीक्षक प्रसन्न राज चौधरीले जानकारी दिनुभयो।

पक्राउ परेका गुरुङमाथि हातहतियार सम्बन्धी कसुर मुद्दामा अनुसन्धान भइरहेको छ। यस सम्बन्धमा जिल्ला अदालत स्याङ्जाबाट म्याद थप गरी कानुनी प्रक्रिया अगाडि बढाइएको प्रहरीले जानकारी दिएको छ।

प्रहरीले अवैध हातहतियार राख्ने वा प्रयोग गर्ने कार्य कानून विपरीत भएको भन्दै यस्ता गतिविधिमा संलग्न नहुन सबैलाई अनुरोध गरेको छ।