भीरकोटको     आधारभूत तहको नतिजा सार्वजनिक

भीरकोट नगरपालिकामा सञ्चालन भएको आधारभूत तह उत्तीर्ण परीक्षा २०८२ को नतिजा सार्वजनिक भएको छ। चैत्र ८ गतेदेखि १७ गतेसम्म संचालित परीक्षाको नतिजा चैत्र ३० गते सार्वजनिक भएको थियो। स्मार्ट अखबारलाई  प्राप्त विवरणअनुसार यस वर्ष परीक्षामा कुल ३ सय २३ जना विद्यार्थी सहभागी भएका थिए। तीमध्ये १ सय ८९ जना विद्यार्थी उत्तीर्ण (ग्रेडेड) भएका छन् भने १ सय ३४ जना विद्यार्थी ननग्रेडेड भएका छन्। यससँगै समग्र उत्तीर्ण प्रतिशत ५८.५१ प्रतिशत पुगेको छ।

नतिजा विश्लेषण गर्दा संस्थागत विद्यालयहरूको प्रदर्शन सन्तोषजनक देखिएको छ भने सामुदायिक विद्यालयहरूको नतिजा अपेक्षाकृत कमजोर रहेको छ। सामुदायिक विद्यालयतर्फ राजेन्द्र भवानी माध्यमिक विद्यालय र सिरकोट माध्यमिक विद्यालय को नतिजा शून्य रहेको छ। सिरकोट मा.वि.बाट सहभागी ६ जना र राजेन्द्र भवानी मा.वि.बाट सहभागी २ जना विद्यार्थीमध्ये कोही पनि उत्तीर्ण हुन सकेनन्।

तर, सामुदायिक विद्यालयतर्फकै पिपलडाँडा माध्यमिक विद्यालय ले उत्कृष्ट नतिजा ल्याउँदै शतप्रतिशत सफलता हासिल गरेको छ। उक्त विद्यालयबाट सहभागी ६ जना सबै विद्यार्थी उत्तीर्ण भएका छन्।

यसैगरी संस्थागत विद्यालयतर्फ कन्साइन्स अंग्रेजी आवासीय माध्यमिक विद्यालय र बालज्योति अंग्रेजी आवासीय माध्यमिक विद्यालय ले पनि उत्कृष्ट प्रदर्शन गरेका छन्। कन्साइन्स मा.वि.बाट परीक्षामा सहभागी २६ जना तथा बालज्योति मा.वि.बाट सहभागी १६ जना सबै विद्यार्थी उत्तीर्ण भई दुवै विद्यालयले शतप्रतिशत नतिजा ल्याएका छन्।

आधारभूत तह परीक्षा (BLE) मा भाग्योदय मा.वि. बाट ४३.४८ प्रतिशत, दहथुम मा.वि. बाट १६.६६ प्रतिशत र सहिद शुक्र मा.वि. बाट ५० प्रतिशत विद्यार्थी ग्रेडेड भएका छन् ।