भीरकोटका  नौ  आधारभूत विद्यालय बालविकास केन्द्रमा सिमित

भीरकोट नगरपालिकामा रहेका नौ वटा आधारभूत विद्यालयलाई समायोजन गरी बाल विकास केन्द्र मात्रै कायम गरिएको छ । वडा नं. ३ मा रहेको २ वटा, ७ का २ वटा र वडा नं. ८ का ५ वटा विद्यालय समायोजन गरिएको नगर प्रवक्ता दिपेन्द्र के. सी. ले जानकारी दिनुभयो ।

वडा नं. ३ का जनविकास आधारभूत विद्यालय(रोजिखोला) र बटुकभैरव आधारभूत विद्यालय(बजारानी), वडा नं. ७ का बाघ भैरवी आधारभूत विद्यालय(चिउरीखर्क) र कालिका आधारभूत विद्यालय(खिलुङ) समायोजनमा परेका हुन् ।

यस्तै, समायोजनमा पर्नेमा वडा नं. ८ का अमर आधारभूत विद्यालय(पखेरे), प्रगतिशील आधारभूत विद्यालय (शालिकोश),रत्न देवीस्थान आधारभूत विद्यालय(खोरबार), सरस्वती आधारभूत विद्यालय(चिलाउनेखार्क) र देउराली भन्ज्याङ आधारभूत विद्यालय (सिरूखर्क) रहेका छन् ।

वडा नं. १ मा रहेको रानीरह आधारभूत विद्यालयलाई सोही वडाको  लक्ष्मी आधारभूत विद्यालय (गजौंदी) मा समायोजन गरिएको छ ।वडा नं. ९ को भविष्य निर्माण आधारभूत विद्यालयलाई कक्षा घटुवा गरी १-३ कायम गरिएको छ ।

विद्यार्थी संख्या एकदमै कम भएका विद्यालयहरू समायोजवा वा कक्षा घटुवा गरिएको शिक्षा शाखा प्रमुख खड्ग बहादुर रानाले जानकारी दिनुभयो । भीरकोट नगरपालिकाको सामुदायिक विद्यालय समायोजन कार्यविधि -२०८२ बमोजिम कक्षा १-३ सम्म ७ जना र १-५ सम्म १० जना न्युनतम विद्यार्थी संख्या नभएका विद्यालय समायोजन गरिएको उहाँले जानकारी दिनुभयो ।

सामुदायिक विद्यालय समायोजन कार्यदल, भीरकोटका अध्यक्ष  एवम्  वडा नं ४ का अध्यक्ष रत्न प्रकाश श्रेष्ठले १२ वटा विद्यालय समायोजनका लागि सिफारिस गरेको जानकारी दिनुभयो। समायोजन गर्नुअघि विद्यालयको स्थलगत अनुगमन र सरोकारवालाहरूसँग विभिन्न चरणमा छलफल गरिएको उहाँले बताउनुभयो । सिफारिस गरिएका मध्ये वडा नं ५ को तिलाहार नेटा आधारभूत विद्यालय  समायोजनमा नपरेको हो ।

समायोजन कार्यदल र शिक्षा समितिले समायोजनका लागि सिफारिस गरेका विद्यालयहरूको विषयमा कार्यपालिका बैठकबाट निर्णय भैसकेको र   शैक्षिक सत्र २०८३ देखि कार्यपालिकाको निर्णयबमोजिम विद्यालय वा कक्षा समायोजन हुने शिक्षा शाखाले जनाएको छ ।

आगामी सोमबारसम्म समायोजन भएका विद्यालयका शिक्षक, कर्मचारी माग र आवश्यकताका आधारमा पायक पर्ने विद्यालयमा खटाइने शिक्षा शाखा प्रमुख रानाले जानकारी दिनुभयो ।