भीरकोटबाट लागूऔषधसहित चार जना पक्राउ

स्याङ्जाको भीरकोट नगरपालिकाबाट लागूऔषधसहित चार जना पक्राउ परेका छन् । पक्राउ परेकाबाट ब्राउन सुगरजस्तो देखिने पदार्थसहित विभिन्न लागूऔषध, नगद र मोबाइल बरामद गरिएको प्रहरीले जनाएको छ ।

जिल्ला प्रहरी कार्यालय स्याङ्जाका अनुसार सोमबार दिउँसो करिब २ बजेको समयमा लागूऔषध कारोबार भइरहेको भन्ने गोप्य सूचनापछि प्रहरीले सञ्चालन गरेको विशेष अप्रेसनमा वडा प्रहरी कार्यालय वालिङ र प्रहरी चौकी दहथुमबाट खटिएको संयुक्त टोलीले भीरकोट नगरपालिका–२ क्षेत्रमा विशेष निगरानी तथा खोजतलास गरेको थियो ।

सो क्रममा वालिङ नगरपालिका–१० का ३० वर्षीय सुविन राना, अर्जुनचौपारी गाउँपालिका–५ रापाकोटका २७ वर्षीय विशाल गुरुङ, भीरकोट नगरपालिका–२ ओसेकका २२ वर्षीय रोशन महत तथा वालिङ नगरपालिका–४ एलादी घर भई हाल भीरकोट–२ दीपेन्द्र मार्ग बस्दै आएका ३६ वर्षीय युवराज गुरुङलाई नियन्त्रणमा लिइएको निमित्त सूचना अधिकारी प्रहरी निरीक्षक अमृत त्रिपाठीले जानकारी दिनुभयो।

उहाँका अनुसार पक्राउ परेकाबाट बुप्रेनोर्फिन १५ एम्पुल, फेनरगन १ एम्पुल, डाइजेपाम ८ एम्पुल, ट्रामाडोल ७ क्याप्सुल र ६ ट्याब्लेट बरामद गरिएको छ । त्यसैगरी ब्राउन सुगरजस्तो देखिने खैरो रंगको डल्लो पदार्थ करिब २० ग्राम, तीन थान मोबाइल सेट र नगद ८० हजार ३४५ रुपैयाँ समेत बरामद गरिएको प्रहरी निरीक्षक त्रिपाठीले बताउनुभयो ।

पक्राउ परेका चारै जनाविरुद्ध लागूऔषध सम्बन्धी कसूरमा मुद्दा दर्ता गरी थप अनुसन्धान अगाडि बढाइएको छ । जिल्ला अदालत स्याङ्जाबाट पाँच दिनको म्याद थप अनुमति लिएर अनुसन्धान प्रक्रिया अघि बढाइएको जिल्ला प्रहरी कार्यालय स्याङ्जाले जनाएको छ ।

यस घटनाबारे जानकारी दिँदै निमित्त सूचना अधिकारी प्रहरी निरीक्षक त्रिपाठीले लागूऔषध नियन्त्रणलाई प्राथमिकतामा राखेर जिल्लाका विभिन्न क्षेत्रमा निगरानी र अप्रेसनलाई निरन्तरता दिइएको बताउनुभयो ।