इन्टरनेट बजारमा वर्ल्डलिंकको वर्चस्व

नेपालको इन्टरनेट बजारमा अग्रणी सेवा प्रदायक  वल्डलिङ्क आफ्नो बर्चस्व कायमै  राख्न सफल भएको छ।  नेपाल दूरसञ्चार प्राधिकरणले प्रकाशित गरेको पछिल्लो प्रतिवेदनअनुसार वर्ल्डलिङ्कले आफ्नो दबदबा कायम राख्न सफल भएको देखिन्छ। प्राधिकरणले प्रकाशन गरेको  एमआईएस प्रतिवेदन अनुसार  नेपालमा ईन्टरनेट प्रयोगकर्ताको संख्या करिब ३ लाखले वृद्धि भएको छ। 

वैशाख २०८२ मा कूल फिक्स्ड ब्रोडब्यान्ड ग्राहक सङ्ख्या ३१ लाख ३२ हजार ३ सय ५० रहेकोमा २०८३ वैशाखसम्म आइपुग्दा यो सङ्ख्या बढेर ३४ लाख ८७ हजार ९ सय ७२ पुगेको छ । यसरी हेर्दा जनसङ्ख्यामा फिक्स्ड ब्रोडब्यान्डको पहुँच ४६.४९ प्रतिशतबाट बढेर ५१.७९ प्रतिशत पुगेको छ । नेपालको दूरसञ्चार बजारमा फिक्स्ड ब्रोडब्यान्ड (विशेषगरी फाइबर इन्टरनेट) को माग दिनानुदिन बढ्दो छ ।

प्रतिवेदन अनुसार इन्टरनेट बजारको लिडर वर्ल्डलिंक कम्युनिकेसन्स लिमिटेडले आफ्नो बर्चस्व कायमै राखेको छ। २०८२ मा वर्ल्डलिङ्कमा  १० लाख ३ हजार ९ सय ४९ ग्राहक  थिए। २०८३ मा आइपुग्दा यसको  १० लाख ७८ हजार ७ सय ९ पुगेको छ । यद्यपि, बजारमा अन्य कम्पनीहरूको आक्रामक वृद्धिका कारण वर्ल्डलिंकको समग्र बजार हिस्सा भने ३२.०५ प्रतिशतबाट घटेर ३०.९३ प्रतिशतमा झरेको छ ।

दोस्रो स्थानमा रहेको नेपाल टेलिकमको ग्राहक सङ्ख्या ३ लाख ५१ हजार ९१२ बाट बढेर ३ लाख ८३ हजार १०१ पुगेको छ भने यसको बजार हिस्सा ११.२३ प्रतिशतबाट १०.९८ प्रतिशतमा खुम्चिएको छ । त्यसैगरी, तेस्रो स्थानमा रहेको डिश मिडिया नेटवर्क लिमिटेड (डिशहोम) ले आफ्नो ग्राहक सङ्ख्या ३ लाख ५० हजार ४०६ बाट बढाएर ३ लाख ६९ हजार २१८ पुर्‍याएको छ ।

शीर्ष स्थानमा रहेका कम्पनीहरूको आधार बलियो भए तापनि भायानेट र क्लासिक टेक जस्ता मध्य-स्तरका कम्पनीहरूको आक्रामक रूपले बजार विस्तार गरिरहेका छन्।

अघिल्लो वर्ष ७४ हजार ग्राहकसहित दशौं स्थानमा रहेको वाईफाई नेपाल यस वर्ष १ लाख ११ हजार भन्दा बढी ग्राहक बनाएर नवौं स्थानमा उक्लिएको छ ।