इन्जिनियर रेग्मीद्वारा दुई विद्यालयलाई शैक्षिक सहयोग

युवा इन्जिनियर उज्ज्वल रेग्मीले भीरकोटका दुई सामुदायिक विद्यालयलाई शैक्षिक सहयोग गर्नुभएको छ। उहाँले  विद्यालयलाई कम्प्युटर तथा ड्रम सेट प्रदान गरी शैक्षिक क्षेत्रप्रति आफ्नो सामाजिक उत्तरदायित्व प्रस्तुत गर्नुभएको हो।

भीरकोट नगरपालिका–६ निवासी इन्जिनियर रेग्मीले जनसेवा आधारभूत विद्यालय, भीरकोट–६ फोक्सिङ र गडी भञ्ज्याङ आधारभूत विद्यालय, भीरकोट–५ गडी भञ्ज्याङ लाई एक/एक थान कम्प्युटर तथा ड्रम सेट प्रदान गर्नुभएको  हो। विद्यालयको प्रशासनिक तथा शैक्षिक गतिविधिलाई थप प्रभावकारी, प्रविधिमैत्री र सहज बनाउन कम्प्युटर सहयोग गरेको रेग्मीले बताउनुभयो।

हालका दिनमा विद्यालय शिक्षामा सूचना प्रविधिको प्रयोग अपरिहार्य बन्दै गइरहेको अवस्थामा प्रदान गरिएको कम्प्युटरले विद्यालयको अभिलेख व्यवस्थापन, प्रशासनिक कार्य, विद्यार्थीको सिकाइ प्रक्रिया तथा विभिन्न शैक्षिक गतिविधिमा महत्वपूर्ण सहयोग पुग्ने अपेक्षा गरिएको छ।

त्यसैगरी ड्रम सेटले विद्यालयका  शारीरिक व्यायम, अतिरिक्त क्रियाकलाप, सांस्कृतिक कार्यक्रम तथा विद्यार्थीको प्रतिभा विकासमा सकारात्मक योगदान पुर्‍याउने विश्वास गरिएको छ।

सहयोग ग्रहण गर्दै गडी भन्ज्याङ आधारभूत विद्यालयका प्रधानाध्यापक सरला बि.क. र जनसेवा आधारभूत विद्यालयका प्रधानाध्यापक निलकण्ठ खनालले    इन्जिनियर रेग्मीप्रति आभार व्यक्त गर्नुभएको छ। उहाँहरूले यस्ता सहयोगले विद्यालयको शैक्षिक वातावरण सुधार गर्न थप ऊर्जा र प्रेरणा मिल्ने बताउनुभएको छ।

सामाजिक सेवामा रुचि राख्ने इन्जिनियर रेग्मीले शिक्षा क्षेत्रको विकासमा सबैको साझा जिम्मेवारी रहेको उल्लेख गर्दै भविष्यमा पनि आवश्यकता अनुसार सहयोगलाई निरन्तरता दिने प्रतिबद्धता व्यक्त गर्नुभएको छ।

स्थानीय स्तरमा व्यक्तिगत पहलबाट गरिएको यो सहयोगले सामुदायिक विद्यालयहरूको गुणस्तरीय शिक्षा र समग्र विकासमा टेवा पुग्नुका साथै समाजका अन्य व्यक्तिलाई समेत प्रेरित गर्ने विश्वास गरिएको छ।