अवैध उत्खनन र ओसारपसारमा संलग्न ट्रयाक्टरलाई ३० हजार जरिवाना

स्याङ्जामा अवैध रूपमा नदीजन्य पदार्थ उत्खनन तथा ओसारपसारमा संलग्न एक ट्रयाक्टरलाई प्रहरीले नियन्त्रणमा लिई ३० हजार रुपैयाँ जरिवाना तिराएको छ।

जिल्ला प्रहरी कार्यालय स्याङ्जाका अनुसार बुधबार राति करिब ८ बजे वडा प्रहरी कार्यालय वालिङबाट खटिएको प्रहरी टोलीले वालिङ नगरपालिका–८ बाँसघारीस्थित आँधीखोला किनारबाट अवैध रूपमा बालुवा लोड गरी ओसारपसार गरिरहेको ग १ त ७३३३ नम्बरको ट्रयाक्टर नियन्त्रणमा लिएको थियो ।

प्रहरीले आवश्यक अनुसन्धान तथा कानुनी कारबाहीका लागि ट्रयाक्टरलाई वालिङ नगरपालिकाको कार्यालय पठाएकोमा  नगरपालिकाले उक्त ट्रयाक्टरलाई ३० हजार रुपैयाँ जरिवाना गरी छाडेको हो।

जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक (डीएसपी) रमेश थापा अवस्थीले नदीजन्य पदार्थको अवैध उत्खनन तथा ओसारपसारविरुद्ध प्रहरीको निगरानी र कारबाही निरन्तर जारी रहने बताउँदै यस्ता गैरकानुनी गतिविधिबारे जानकारी भए तत्काल नजिकको प्रहरी कार्यालयमा सूचना दिन सर्वसाधारणलाई आग्रह गरेका छन्।