बाढीपीडितका लागि स्याङ्जाका तीन स्थानीय तहको सहयोग

रसुवाको भोटेकोशी हुँदै त्रिशूली नदीमा आएको बाढीबाट प्रभावित परिवारको राहत, उद्धार तथा पुनःस्थापनाका लागि स्याङ्जाका तीन स्थानीय तहले आर्थिक सहयोगको घोषणा गरेका छन् । भीरकोट नगरपालिका, अर्जुनचौपारी गाउँपालिका र आँधीखोला गाउँपालिकाले प्रधानमन्त्री दैवी प्रकोप उद्धार कोषमा सहयोग उपलब्ध गराउने निर्णय गरेका हुन् ।

भीरकोट नगरपालिकाले बाढीबाट प्रभावित क्षेत्रका लागि पाँच लाख रुपैयाँ आर्थिक सहयोग गर्ने निर्णय गरेको छ । नगरपालिकाले रसुवा, नुवाकोट, गोरखा, धादिङ र चितवनलगायत जिल्लामा भएको प्राकृतिक विपत्तिप्रति दुःख व्यक्त गरेको छ ।नगरपालिकाका जनप्रतिनिधि तथा कर्मचारीबाट समेत दुई लाख रुपैयाँ सहयोग संकलन गर्ने र कर्मचारी तथा शिक्षकको पाँच दिन बराबरको तलब सुविधाबाट रकम जुटाउने निर्णय भएको नगर प्रमुख गोविन्द कुमार कर्माचार्यले जानकारी दिए।

यस्तै, अर्जुनचौपारी गाउँपालिकाले बाढीपहिरो प्रभावित क्षेत्रमा राहत तथा मानवीय सहयोगका लागि एक लाख रुपैयाँ उपलब्ध गराउने निर्णय गरेको छ । गाउँपालिकाका जनप्रतिनिधि र कर्मचारीले स्वेच्छिक रूपमा रकम संकलन गरी प्रकोप व्यवस्थापन कोषमा जम्मा गर्ने भएका छन् ।

गाउँपालिकाले सहयोग गर्न चाहने व्यक्ति, संघसंस्था तथा विदेशमा रहेका नागरिकलाई पालिकाको प्रकोप व्यवस्थापन कोषको खातामा रकम जम्मा गर्न समेत अनुरोध गरेको छ । यसरी संकलित रकम सरकारको प्रधानमन्त्री दैवी प्रकोप उद्धार कोषमा जम्मा गराइने गाउँपालिका अध्यक्ष प्रकाश तिवारीले जानकारी दिए।

आँधीखोला गाउँपालिकाले पनि यस वर्ष आयोजना गर्ने भनिएको तीजगीत प्रतियोगिता स्थगित गरी त्यसका लागि छुट्याइएको रकम प्रधानमन्त्री दैवी प्रकोप उद्धार कोषमा जम्मा गर्ने निर्णय गरेको गाउँपालिका अध्यक्ष विश्व पौडेलले जानकारी दिएका छ्न्।