वालिङमा सडक दुर्घटना : २ जना घाइते, एकको अवस्था गम्भीर

स्याङ्जाको वालिङ नगरपालिका–६ पाडेटारीमा हाईस र मोटरसाइकल एकआपसमा ठोक्किँदा दुई जना घाइते भएका छन्। घाइतेमध्ये एक जनाको अवस्था गम्भीर रहेको प्रहरीले जनाएको छ।

बिहीवार दिउँसो करिब १२ः२० बजे मिर्दीबाट चापाकोटतर्फ जाँदै गरेको ग १ ज ८४३७ नम्बरको विद्युतीय (ईभी) हाईस र विपरीत दिशाबाट आउँदै गरेको लु ९६ प ५९४७ नम्बरको मोटरसाइकल एकआपसमा ठोक्किएका थिए।
दुर्घटनामा मोटरसाइकल चालक पाल्पाको रामपुर नगरपालिका–५ का ३२ वर्षीय सुरज अधिकारी घाइते भएका छन्। उनको टाउको र अनुहारमा चोट लागेको र अवस्था गम्भीर रहेको प्रहरीले जनाएको छ। मोटरसाइकलमा सवार सोही स्थानका २३ वर्षीय सरोज बिकको बायाँ हात र टाउकोमा चोट लागेको छ। उनको अवस्था मध्यम रहेको प्रहरीले जनाएको छ।

दुवै घाइतेलाई उपचारका लागि प्राथमिक स्वास्थ्य केन्द्र वालिङ लगिएको थियो। त्यहाँ सामान्य उपचारपछि थप उपचारका लागि गण्डकी अस्पताल, पोखरा रेफर गरिएको प्रहरीले जनाएको छ।

दुर्घटनामा संलग्न दुवै सवारीसाधन र हाईस चालक स्याङ्जाको भिरकोट नगरपालिका–८ रिपका करिब ४९ वर्षीय चोकबहादुर गुरुङलाई प्रहरीले नियन्त्रणमा लिएको छ।

घटनास्थलमा वडा प्रहरी कार्यालय वालिङबाट ट्राफिक प्रहरीसहितको टोली खटिएको थियो। घटनाबारे थप अनुसन्धान भइरहेको जिल्ला प्रहरी कार्यालय स्याङ्जाले जनाएको छ।