मिर्मी हर्मीचौर पुल बग्यो: सरकारको बेवास्ताले गर्दा यात्रु र स्थानीयलाई सास्ती

कालीगण्डकी नदीमा आएको बाढीले स्याङ्जाको मिर्मी र गुल्मीको हर्मिचौर जोड्ने पुल बगाएको छ ।

कालीगण्डकी ‘ए’ जलविद्युत् आयोजनाको ड्याम साइटभन्दा तल रहेको पुल आइतबार बिहान बाढीले बगाएको हो ।

ड्याम साइटमा पानीको बहाव बढेसँगै पुल बाढीले बगाएको नेपाल विद्युत् प्राधिकरण कालीगण्डकी ‘ए’ जलविद्युत् केन्द्रमा कार्यरत विष्णुप्रसाद न्यौपानेले जानकारी दिए ।

जिल्ला प्रहरी कार्यालय गुल्मीका प्रमुख प्रहरी उपरीक्षक भीमकिरण बोगटीले पनि पुल बाढीले बगाएको पुष्टि गरे । उनका अनुसार उक्त पुल बेलिब्रिज प्रकारको थियो र चारपांग्रे सवारीसाधन त्यसैबाट मिर्मी र हर्मिचौरतर्फ आवतजावत गर्दै आएका थिए ।

‘बेलिब्रिज टाइपको पुल थियो, चारपांग्रे गाडीहरू त्यही पुलबाट वारपार गर्थे, आज बिहान ६ बजेतिर बाढीले बगायो,’ एसपी बोगटीले भने ।

पुल बगेपछि स्याङ्जाको मिर्मी र गुल्मीको हर्मिचौरबीचको सवारी आवतजावत प्रभावित भएको प्रहरीले जनाएको छ ।

२०५३ सालमा कालीगण्डकी ए जलविद्युत आयोजना निर्माणका लागि तत्कालका लागि समान ढुवानी गर्नका लागि कालीगण्डकी ए ड्याम भन्दाको तल मिर्मी र हर्मिचौर जोड्ने बेली ब्रिज निर्माण गरिएको थियो। निर्माणको काम सकिएको सो पुलको रेखदेखको जिम्मा उक्त पुलले जोड्ने कालीगण्डकी गाउँपालिका, स्याङ्जा र कालीगण्डकी गाउँपालिका, गुल्मीलाई दिइएको थियो।

केही समय लागि मात्र बने उक्त पुल करिब ३० वर्षसम्म प्रयोगमा थियो। पछिल्लो समय निकै जीर्ण रहेको उक्त पुल आइतबार बिहान कालीगण्डकी नदीमा आएको बाढीले  बगाएको हो।

गण्डकी प्रदेश र लुम्बिनी प्रदेश जोड्ने उक्त पुलको प्रयोग स्याङ्जाको मिर्मी तथा गुल्मीको हर्मिचौर, पुर्तिघाट, रूद्रबेनी यात्रा तथा मालसामानको ढुवानीका लागि भैरहेका थियो।

उक्त पुल नाजुक तथा जिर्ण बन्दै गएको जस्ले गर्दा त्यो पुल प्रयोग गरि यात्रा गर्नेले ज्यानको जोखिम मोलेर  यात्रा गर्नु पर्ने अवस्थाको बारेमा जानकारी भैरहँदा पनि तिनै तहका सरकारबाट सो पुलको मर्मत सम्भार तथा नयाँ पुल निर्माणको लागि जन अपेक्षा अनुरुप पहल कदमी नभएको गुनासो स्थानीय रहेको छ।

बारम्बार ताकेता गर्दा पनि कुनै पनि तहको सरकारको ध्यान नपुग्दा अब उक्त पुल आसपास जनसमुदाय तथा अन्य यात्रुले पनि सास्ती बेहोर्नु पर्ने अवस्था आएको छ।

केही महिना अगाडि नेपाल सरकारका भौतिक पूर्वाधार मन्त्री सुनिल लम्साल समक्ष  पनि यो पुल अवस्थाको बारेमा जानकारी र तत्काल नयाँ पुलको  निर्माणको माग  स्थानियले राखेका थिए।

नयाँ पुल निर्माणका लागि संघ , प्रदेश तथा स्थानीय तहले समन्वय गरी छिटोभन्दा छिटो निर्माण कार्य अगाडि बढाउनु पर्दछ ।पुल निर्माणमा ढिलाई भएमा आवश्यक मालसमानको ढुवानी, स्थानिय जनजीवन प्रभावित हुने तथा यात्रुहरुलाई कठिनाई हुने देखिन्छ।