जीवनज्योतीमा शैक्षिक पुरस्कार वितरण 

जीवनज्योती अंग्रेजी आवासीय माध्यमिक विद्यालयले विद्यार्थीहरूलाई शैक्षिक पुरस्कार वितरण गरेको छ। वालिङ नगरपालिका वडा न १३ थानपाटामा अवस्थित विद्यालयले शुक्रबार  एक  औपचारिक समारोहको विचमा वि.सं २०८० र २०८१ सालको शैक्षिक सत्रको पुरस्कार वितरण कार्यक्रम विविध क्रियाकलाप सहित सम्पन्न गरेको हो । 

कार्यक्रमका प्रमुख अतिथी एवं वडा नं १३ का वडा अध्यक्ष नमलाल डुम्रेले संस्थागत विद्यालयले शैक्षिक गुणस्तर अधिवृद्धिको लागि गरेको योगदानको प्रशंसा गर्नुभएको थियो ।  कार्यक्रममा विशिष्ट अतिथी एवं  समाजसेवी चण्डी प्रसाद पाठकले विद्यालयले प्रदर्शन गरेका विभिन्न गतिविधी, एसइइ नतिजा र कक्षा आठको नगरपालिकास्तरीय परीक्षाको नतिजा राम्रो भएकोमा खुशी व्यक्त गर्दै  नतिजाको निरन्तरताको शुभकामना प्रदान गर्नुभएको थियो ।

 उक्त समारोहमा विद्यार्थीहरुले देशको परिस्थीती झल्कने ‘देशको छायाँ’ नामक नाटक प्रदर्शन गरेका थिए । कार्यक्रममा विद्यार्थीहरुले हस्तलेखन, चित्रकला, कलाआकृति लगायतका सृजनात्मक  विषयवस्तु समेटेर एक स्टल प्रदर्शन गरेका थिए । विद्यालयका प्रिन्सिपल याम बहादुर जि.सी (सुनिल) ले विद्यालयले गरिरहेका गतिविधी र भावी योजनाको बारेमा प्रकाश पार्नुका साथै अहिलेको विद्यार्थीहरुमा सामाजिक सञ्जालले पारेको नकरात्मक प्रभावको बारेमा चर्चा गर्नुभएको थियो ।

कार्यक्रममा  एसइइ मा  शतप्रतिशत नतिजा ल्याउने विषय शिक्षकहरुलाई पनि सम्मान गरिएको थियो । कार्यक्रममा अभिभावक, समाजसेवी लगायतको उल्लेखनीय सहभागीता थियो । कार्यक्रम समापन गर्दै विद्यालय व्यवस्थापन समितीका अध्यक्ष एवं उक्त कार्यक्रमका सभापती गोविन्द प्रसाद न्यौपानेले विद्यालयको शैक्षिक  गुणस्तर अभिवृद्धि गर्न समिती सदैव तयार रहेका बताउनुभयो।