सनातन धर्म संस्कृतिको रक्षा गर्न ब्राह्मण संग्राहलय

सनातन धर्म संस्कृतिको रक्षा गर्न एवं पर्यटन प्रवर्द्धन गर्न स्याङ्जामा ब्राह्मण संग्रहालय निर्माण गरिएको छ। स्याङ्जाको आँधिखोला गाउँपालिकाको वडा नं १ बाटास्वारामा पर्यटन बोर्ड, सांसद विकास कोष, प्रदेश पर्यटन बोर्ड र आँधिखोला गाउँपालिकाको सहकार्यमा ब्राह्मण संग्राहलय निर्माण भैरहेको वडा अध्यक्ष पवनकाजी अधिकारीले जानकारी दिनुभयो। संग्राहलय निर्माणमा हालसम्म २५ लाख रूपैयाँ खर्च भैसकेको निर्माण समितिले जानकारी दिएको छ।

संग्रहालय निर्माण समितिका अध्यक्ष थम नारायण ढकालले संग्राहलयमा ब्राह्मण समुदायका मानिसहरूले परम्परागत रूपमा  प्रयोग गरेका सामाग्रीहरूलाई प्राथमिकताका साथ राख्ने तयारी भैरहेको बताउनुभयो। परम्परागत  गोलघर शैलीमा निर्माण गरिएको संग्रहालयलाई परम्परागत  कलात्मक बनाउन स्थानीय स्तरमा पाइने ढुङ्गाले छाइएको छ।

संग्राहलयको भवन निर्माण सम्पन्न गर्न पर्यटन मन्त्रालय र आँधिखोला गाउँपालिकाको सहलगानीमा यो वर्ष थप २५ लाख बजेट विनियोजन गरिएको गाउँपालिका अध्यक्ष विश्व पौडेलले जानकारी दिनुभयो। दुई रोपनी क्षेत्रफलमा फैलिएको संग्रालय परिसर थप व्यवस्थित र धार्मिक / सांस्कृतिक दृष्टिले समेत कलात्मक बनाइने  निर्माण समितिका अध्यक्ष ढकालले जानकारी दिनुभयो ।