नवग्रह मन्दिर परिसरमा नक्षत्र वाटिका स्थापना 

नेपालकै पहिलो नवग्रह मन्दिर तथा पञ्चकन्या मन्दिर परिसरमा नक्षत्र वाटिकाको स्थापना गरिएको छ।   हरिशयनी एकादशीको पावन अवसरमा नक्षत्र वाटिकामा   धार्मिक  तथा  पर्यावरणीय महत्त्वका २७ थरी विरूवाहरू रोपिएको छ। धार्मिक, पर्यावरणीय   र सांस्कृतिक  महत्वको नवग्रह मन्दिर र पञ्चकन्या मन्दिर परिसरमा  २७ वटै नक्षत्रसँग सम्बन्धित विरुवा विधिपूर्वक पूजा गरी रोपिएको नवग्रह मन्दिर व्यवस्थापन समितिका अध्यक्ष भरतराज पोख्रेलले जानकारी दिनुभयो। उहाँका अनुसार वाटिकामा अशोक, अमला, बेल, जामुन, खयर ,कदम, रूद्राक्ष , निम लगायतका २७ प्रकारका बिरुवा रोपिएका छन्।

नवग्रह मन्दिर व्यवस्थापन समिति र पञ्चकन्या मन्दिर व्यवस्थापन समितिको संयुक्त आयोजनामा सम्पन्न वृक्षारोपण कार्यक्रममा पिपल, तुलसी लगायतका पवित्र वनस्पतिहरू पनि  रोपिएका छन्। विशेष गरी १०८ पिपल रोप्ने संकल्पअनुसार केही पिपल विरुवाको सङ्ख्या अझै अपुग रहेकोले, आगामी एकादशीमा थप वृक्षारोपण गरिने पञ्चकन्या मन्दिर व्यवस्थापन समितिका अध्यक्ष  रामु विष्ट क्षेत्रीले जानकारी दिनुभयो।

वृक्षारोपण कार्यलाई नक्षत्रको दिशानिर्देश अनुसार विधिपूर्वक पूजा–विधान सम्पन्न  गरिएको थियो। वृक्षारोपण कार्यक्रममा   श्रद्धालु, साधक, समितिका पदाधिकारी तथा भक्तजनहरूको सहभागिता रहेको थियो।

नवग्रह मन्दिर व्यवस्थापन समितिका सचिव  लाल बहादुर क्षेत्रीले आगामी योजनाका बारेमा जानकारी दिँदै “नक्षत्र वाटिका पछि हामी राशि वाटिका र नवग्रह वाटिका पनि क्रमशः निर्माण गर्दैछौँ। यो स्थानलाई नेपालकै नमुना धार्मिक–प्राकृतिक अध्ययनस्थलको रूपमा विकसित गर्ने हाम्रो योजना रहेको छ।”  

"यो कार्यक्रम केवल वृक्षारोपणको क्रियाकलाप मात्र नभई, शास्त्रसम्मत नक्षत्र–वृक्ष परम्पराको पुनर्स्थापना, वातावरण संरक्षण तथा धर्म–संस्कृति संवर्द्धनको एक महान पहल हो साथै प्रत्येक शनिवार नवग्रह मन्दिर मा विशेष पुजा हुने हुनाले सम्पूर्ण भक्तजन लाइ उपस्थिती को पनि निमन्त्रणा गर्दछौं ।" क्षेत्रीले बताउनु  भयो ।