प्राकृतिक चिकित्सा सम्बन्धी जनचेतनामूलक कार्यक्रम सम्पन्न

सामुदायिक प्राकृतिक चिकित्सालय, देवचुलीद्वारा स्याङ्जाको वालिङ र गल्याङ नगरपालिकामा प्राकृतिक चिकित्सा तथा योगको महत्वबारे जनचेतनामूलक कार्यक्रम सम्पन्न गरिएको छ । आहार–विहारमा आएको अव्यवस्था तथा तनावपूर्ण जीवनशैलीका कारण जनमानसमा दीर्घ रोगहरूको समस्या दिनप्रतिदिन विकराल बन्दै गइरहेका बेला उक्त चिकित्सालयले नागरिकलाई जीवनशैली परिवर्तनमार्फत रोग मुक्त बनाउने उद्देश्यले यो कार्यक्रम सञ्चालन गरेको हो ।

रोगीलाई निरोगी र निरोगीलाई दीर्घजीवी बनाउने उद्धेश्यले यो कार्यक्रम आयोजना गरिएको चिकित्सालयका प्रमुख चिकित्सक डा आजाद पुरीले बताउनुभयो । 

“मानिसलाई स्वस्थ राख्ने उद्धेश्यले देशभर अस्पतालहरु खोलिएका छन् । तर रोगीहरुको संख्या घट्न पर्ने ठाउँमा दिनानुदिन दिर्घरोगीको संख्या र नयाँ रोग बढ्न थालेको छ” , पुरीले बताउनुभयो । 

वालिङ नगरपालिकाले पनि यसै वर्षबाट सामुदायिक वन , निजी र बाँझो जग्गामा जडिबुटी लगाउने योजना अघि सारेको नगर उपप्रमुख कविता तिवारी गैरेले जानकारी दिनुभयो । नगरले सामुदायिक विद्यार्थीलाई लक्षित गरेर विद्यार्थीहरुलाई दैनिक योग अभ्यास शिविर संचालन गरेको गैरेको भनाई छ । 

चिकित्सालयका व्यवस्थापक हरि सापकोटाका अनुसार, २०६० सालमा आफैंलाई एकसाथ ७ वटा रोगले समातेपछि उहाँले वैकल्पिक उपचारको बाटो रोज्दै २०६४ सालमा महायज्ञको आयोजना गरी ५२ शैयाको अस्पतालको रूपमा चिकित्सालयको स्थापना गर्नुभएको थियो । हाल सो अस्पतालको क्षमता ३०० शैयामा पुगेको छ र आगामी वर्षदेखि योग तथा नेचुरोपेथी शिक्षण अस्पतालका रूपमा विस्तार गर्ने लक्ष्य रहेको उनले जानकारी दिनुभयो ।

सापकोटा भन्नुहुन्छ , “हालसम्म झण्डै ६० हजारजना जटिल, जिर्ण तथा असाध्य रोगबाट पीडित बिरामीले नयाँ जीवन प्राप्त गरिसकेका छन् । कोभिड–१९ को महामारीका क्रममा पनि चिकित्सालयले ८०० जना संक्रमित लाई राखी शत–प्रतिशत नतिजा हासिल गरेपछि नेपाल सरकारबाट राष्ट्रिय सम्मानसमेत प्राप्त गर्न सफल भएको थियो ।”

यस वर्ष गण्डकी प्रदेशका ११ जिल्लाका ८५ स्थानीय तहमा ‘भान्सा नै औषधालय, जीवनशैली नै उपचार’ भन्ने नारासहित जनचेतनामूलक महाअभियान सञ्चालन गरिएको छ । यही अभियानअन्तर्गत चालु आर्थिक वर्ष २०८२/८३ को पहिलो चरणको कार्यक्रम स्याङजाबाट सुरु गरिएको देवचुली नगरपालिकाका नगरप्रमुख हरि प्रसाद न्यौपानेले बताउनुभयो ।

कार्यक्रमको उद्देश्य नागरिकलाई प्राकृतिक चिकित्सा, योग, स्वस्थ आहार र जीवनशैलीमा सुधार ल्याई जटिल, जिर्ण तथा असाध्य रोगहरूबाट बचाउने हो । आगामी वर्षदेखि यो अभियानलाई विस्तार गर्दै ७५३ वटै स्थानीय तहसम्म पुर्‍याउने लक्ष्य रहेको चिकित्सालयले जनाएको छ ।