चापाकोटमा स्वास्थ्य शिविर : शिविरबाट ७ सय २७ जना लाभान्वित 

खुमा अर्याल फाउन्डेसन , स्याङ्जाले बृहत् स्वास्थ्य शिविर एवम् रक्तदान कार्यक्रम गरी सातौ स्थापना दिवस मनाएको छ । फाउन्डेसनले स्याङ्जाको चापाकोट नगरपालिका ४ स्थित मल्याङ्कोट स्वास्थ्यचौकी दार्सिङमा चापाकोट नगरपालिकाको समन्वय, गण्डकी मेडिकल कलेज पोखरा र नेपाल रेडक्रस सोसाइटी स्याङ्जाको प्राविधिक सहयोगमा बृहत् स्वास्थ्य शिविर गरि शुक्रबार आफ्नो स्थापना दिवस मनाएको हो । 

शिविरबाट ७ सय २७ जना स्थानिय बासिन्दाहरु लाभान्वित भएको फाउण्डेशनका अध्यक्ष लेखनाथ शर्माले जानकारी दिनुभयो।  विशेषगरी चापाकोट नगरपालिकाका वडा नम्बर ३, ४, र ५, त्यस्तैगरी बिरुवा गाउपालिका ६ र हरिनाश गाउपालिका ५ का बासिन्दाहरु लाभान्वित भएका  छन् । 

शिविरमा मुटु रोग, पेट, छाती, सुगर, रेडियोलोजि, नाक कान, घाँटी, स्त्रीरोग, हाडजोर्नी, बाथ तथा छाला रोग, नशा रोग, दन्त रोग, बाल रोग लगायतका बिरामीहरुको स्वास्थ्य परिक्षण गरिएको थियो । यस्तै, जटिल समस्या भएका बिरामीहरुका लागि गण्डकी मेडिकल कलेज पोखरा रिफर गरिएको छ भने रिफर गरिएका बिरामीहरुका लागि औषधिमा ५ प्रतिशत र सेवामा २० प्रतिशत सम्म छुट दिइने जनाइएको छ । शिविरमा महिलाहरुको पाठेघरको क्यान्सरको लागि विशेषज्ञ परिक्षण एवम् भिडियो एक्स रे, मुटुको भिडियो एक्स रे, इको, इ सि जि तथा प्रयोगशाला सेवा समेत उपलव्ध रहेको थियो ।  कार्यक्रममा ८ पिन्ट रगत संकलन  भएको  थियो । 

खुमा फाउन्डेसनले विगत सात वर्ष देखि सामाजिक कार्यमा सक्रिय रहदै आएको छ । हरेक वर्ष फाउन्डेसनले स्थापनाको अवसरमा मंसिर ५ मा विभिन्न रचनात्मक र राहत मुलक कार्यक्रमहरु आयोजना गरेर दिवस मनाउँदै आएको छ । 

शिविरको उद्घाटन गर्दै चापाकोट नगरपालिकाका नगर प्रमुख देव बहादुर खाँण ईश्वरले खुमा अर्याल फाउन्डेसनले चापाकोट नगरपालिकामा आएर स्थानिय बासिन्दालाई स्वास्थ्य सेवामा सकारात्मक सहयोग र सेवा दिएकोमा धन्यवाद व्यक्त गर्नुभयो। उनले सामाजिक कार्यमा खुमा अर्याल फाउण्डेसनले लिइरहेको गति र समाज प्रतिको जिम्मेवारीबोध र दायित्व प्रशंसा योग्य रहेको समेत बताउनुभयो । 

कार्यक्रममा वरिष्ठ उद्यमी  तथा फाउण्डेसनका संस्थापक खुमा प्रसाद अर्यालले सबैको साथ र सहयोगले सामाजिक कार्यमा जुट्नको लागि थप हौसला र प्रेरणा मिलिरहेको बताउनुभयो। उहाँले पालिका लगायत सबै समन्वयकर्ताहरुलाई धन्यवाद दिनभएको थियो।

कार्यक्रममा नगर उप प्रमुख इशा राना, फाउण्डेसनकी संस्थापक परिवार डाक्टर लुना अर्याल, चापाकोट नगरपालिका वडा न ४ का वडा अध्यक्ष अर्जुन कुमार खाँण, गण्डकी मेडिकल कलेज पोखराका कृष्ण पौडेल, नेपाल रेडक्रस सोसाइटी जिल्ला शाखा स्याङ्जाका सभापति दिनेश अर्याल लगायतको सहभागिता  रहेको थियो।