रहस्यमय देउपूजे ढुङ्गा 

स्याङ्जाको भीरकोट नगरपालिका वडा नं ३ भतेरपाटामा अवस्थित ‘देउपुजे ढुङ्गा’ को धार्मिक , ऐतिहासिक र पर्यटकीय  महत्व छ।  विगतमा "केपुल ढुङ्गा " का नामले स्थानीय स्तरमा परिचित यो धार्मिक पर्यटकीय स्थलबाट स्याङ्जा , तनहुँ , कास्की, पर्वत र पाल्पाका मनोरम डाँडाकाँडा देख्न सकिन्छ।  ठूलो सामुदायिक वनको काखमा रहेको देउपूजे ढुङ्गाबाट धौलागिरी, माछापुच्छ्रे, अन्नपूर्ण लगायतका हिमशृङ्खला १८० डिग्रीमा अवलोकन गर्न सकिन्छ। 

स्थानीयहरूले देउपुजे ढुङ्गालाई  शिवलिङ्गको स्वरुपमा समेत पूजा गर्ने गर्दछन्। देउपुजे ढुङ्गाको काखमा शिवको मन्दिर पनि निर्माण गरिएको छ। यहाँ  बालाचतुर्दशीमा सत्बिज छर्न श्रद्धालु भक्तजनहरूको भीड लाग्ने गर्दछ।  बालाचतुर्दशीमा भीरकोट, वालिङ र पुतलीबजार नगरपालिकाका स्थानीयहरू सत्बिज छर्न आउने स्थानीय शिक्षक केश बहादुर सार्कीले जानकारी दिनुभयो। बालाचतुर्दशीमा सत्बिज छर्नाले पितृऋण बाट मुकति पाइने, पितृ उद्धार तथा भाकल पूरा हुने जनविश्वास छ।

गाउँमा  लामो समयसम्म खडेरी परेमा यही ढुङ्गामा स्थानीयहरू भेला भएर बाजा बजाएर भगवानसँग पानी माग्ने चलन लामो समयसम्म चलेको थियो। २०५५ सालसम्म यो चलन रहेको सार्कीले बताउनुभयो। लामो खडेरीको समयमा  देउपूजे ढुङ्गामा  पूजाआजा गरेपछि वर्षा हुने भएकाले यो ढुङ्गालाई रहस्यमय मानिने स्थानीय किसान के.सी.ले बताउनुभयो। औसत २५ मिटर गोलाई र १५ मिटर उचाइको अजंगको यो ढुङ्गा डाँडामा अवस्थित छ। पहारिलो डाँडामा भएपनि यो पत्थरमा बाह्रै महिना चिसो अर्थात् पानीको मात्रा पाइन्छ।वर्षायाममा भने यो ढुङ्गाबाट नै मूल फुट्ने गर्छ।

बयरघारीबाट करिब १० किमि कच्ची/ पक्की सडकको यात्रामा पुग्न सकिने यो ठाउँ एकदमै रमणीय छ। यहाँबाट भीरकोटका सुन्दर फाँटहरू, नागबेली परेर बगेको आँधिखोला देख्न सकिन्छ। यहाँ आउने पर्यटकको सुविधाका लागि   प्रतीक्षालय,  बेञ्च र खानेपानीको व्यवस्थापन गरिएको छ । पूजाआजाका लागि देउपूजे ढुङ्गाको काखमा मन्दिर समेत निर्माण गरिएको छ।समुन्द्र सतहदेखी १ हजार ५ सय मिटरमा अवस्थित यो स्थान बनभोज , पदयात्रा र दृश्यावलोकनका लागि समेत स्थानीय पर्यटकहरूको रोजाइमा पर्ने गरेको छ।