अर्जुनचौपारीमा २ हजार भन्दा बढी विद्यार्थीको दृष्टि परीक्षण 

स्याङ्जाको अर्जुनचौपारी गाउँपालिकामा २ हजार भन्दा बढी विद्यार्थीहरूको आँखाको दृष्टि परीक्षण गरिएको छ। ४ दिनसम्म वडागत रूपमा विभिन्न विद्यालयमा  सञ्चालन गरिएको स्वास्थ्य  शिविरमा कुल २ हजार २ सय ५९ जनाको आँखाको दृष्टि परीक्षण गरिएको छ। परीक्षण गरिएका  २ सय १७ जनामा थप उपचार आवश्यक देखिएपछि रेफर गरिएको स्वास्थ्य शाखाले जानकारी दिएको छ ।

पहिलो दिन वडा नं. १ का विद्यालयहरूमा सुरु भएको शिविरमा ७ सय४३ जनाको आँखा परीक्षण गरिँदा १सय१ जना विद्यार्थीलाई रेफर गरिएको थियो । दोस्रो दिन वडा १, २ र ३ का विद्यालयमा परीक्षण हुँदा ५ सय ६१ जनाको परीक्षण गर्दा ४७ जनालाई थप उपचारका लागि रेफर गरिएको थियो । यस्तै, तेस्रो दिन वडा नं. ५ का विद्यालयमा जाँच गरिएको थियो, जहाँ ४२६ जनाले परीक्षण गर्दा ३४ जनामा समस्या भेटिएको थियो । चौथो दिन वडा ४ र ६ का विद्यालयमा परीक्षण हुँदा ५ सय २९ जनाले सेवा लिएका थिए भने ३५ जनालाई रेफर गरिएको थियो ।

विद्यालयमै गएर स्वास्थ्य सेवा पुर्‍याउनु गाउँपालिकाको प्राथमिकतामा रहेको गाउँपालिका अध्यक्ष प्रकाश तिवारीले बताउनुभयो । उहाँका अनुसार, “विद्यार्थीको दृष्टि समस्याले पढाइ र विकास दुवैमा प्रभाव पार्छ । त्यसैले हामीले यस्तो लक्षित स्वास्थ्य सेवा गाउँघरमै पुर्‍याइरहेका छौँ । रेफर भएका बालबालिकालाई पनि सम्पूर्ण उपचार निःशुल्क उपलब्ध गराइनेछ,” तिवारीले भन्नुभयो। उहाँले स्थानीय विद्यालय, अभिभावक र स्वास्थ्यकर्मीको सहकार्यका कारण अभियान प्रभावकारी बनेको उल्लेख गर्दै पालिकले सुरु गरेको ‘स्वस्थ आँखाबाट उज्यालो भविष्य’ अभियानलाई निरन्तरता दिने बताउनुभयो ।

परीक्षणबाट रेफर गरिएका विद्यार्थीहरूको पहिलो चरणको उपचार गाउँपालिका भवनमै रहेको आँखा उपचार केन्द्रमार्फत गरिने प्रमुख प्रशासकीय अधिकृत युवराज अर्यालले जानकारी दिनुभयो । यहाँसमेत समाधान नहुने अवस्थामा हिमालयन आँखा अस्पताल पोखरामा निःशुल्क उपचारका लागि पठाइने अर्यालले बताउनुभयो ।