उद्यमशीलता र संस्कृतिको संरक्षणका  बाजा बजाउने तालिम

भीरकोट नगरपालिका वडा नं. ५ ले महिलाको सीप विकास, आत्मनिर्भरता र स्थानीय संस्कृतिको संरक्षणलाई केन्द्रमा राख्दै दुई महिने पञ्चे बाजा बजाउने तालिम सञ्चालन गरेको छ। उक्त तालिममा स्वरेक चण्डी कालिका आमा समूह र डाँडामाथी वारि आमा समूहका गरी दुई समूहका २६ जना महिलाको सहभागिता रहेको छ। वडा कार्यालयको पहलमा सञ्चालन भएको यो तालिमले महिलालाई व्यावहारिक सीप प्रदान गर्दै आर्थिक सशक्तीकरणतर्फ उन्मुख गराउने लक्ष्य राखेको छ।

वडा अध्यक्ष  कृष्ण बहादुर थापाका  अनुसार तालिमको प्रमुख उद्देश्य महिलालाई उद्यमी बन्न प्रेरित गर्नु, आम्दानीको दिगो स्रोत सिर्जना गर्नु तथा पुस्तौँदेखि चलिआएको स्थानीय बाजा, कला र संस्कृतिको संरक्षण गर्नु हो। यस्ता कार्यक्रमले समुदायमा रोजगारीका अवसर विस्तार गर्नुका साथै सांस्कृतिक पहिचान जोगाउन महत्वपूर्ण भूमिका खेल्ने उहाँको भनाइ छ।

तालिममा अनुभवी प्रशिक्षकहरू अर्जुन परियार, देबेन्द्र परियार र विक्रम परियार को सक्रिय संलग्नता रहेको छ। प्रशिक्षकहरूले बाजा बजाउने आधारभूतदेखि उन्नत अभ्यास, तालमेल र प्रस्तुतीकरणका पक्षमा केन्द्रित रहेर प्रशिक्षण दिइरहेका छन्।

तालिममा सहभागी आमा समूहका महिलाहरूले यस अवसरप्रति खुसी व्यक्त गरेका छन्। उनीहरूका अनुसार उद्यमी बन्ने सोचका साथ तालिममा सहभागी भएका उनीहरूले आफ्नै ठाउँमा बसेर सीप सिक्न पाउँदा उत्साह थपिएको छ। तालिमपछि समूह बनाएर व्यवसायिक रूपमा बाजा बजाउने योजना पनि उनीहरूले व्यक्त गरेका छन्।

यस कार्यक्रमका लागि उपमेयरसँग महिला कार्यक्रमअन्तर्गत १ लाख ५० हजार रुपैयाँ र वडा कार्यालयबाट १ लाख ५० हजार रुपैयाँ गरी कुल ३ लाख रुपैयाँ बजेट विनियोजन गरिएको छ। साथै सहभागीहरूलाई खाजा सुविधासमेत उपलब्ध गराइएको वडा कार्यालयले जनाएको छ। समग्रमा, यो तालिम महिलाको क्षमता विकास र स्थानीय संस्कृतिको प्रवर्द्धनतर्फको महत्वपूर्ण कदमका रूपमा लिइएको छ।