शुभलक्ष्मी सहकारी र जीएमसी बीच सम्झौता : सहकारीका  सदस्यलाई उपचारमा छुट

भीरकोट नगरपालिकाको  अग्रणी सहकारी संस्था शुभलक्ष्मी बचत तथा ऋण सहकारी संस्था लिमिटेडका सदस्यहरूले गण्डकी मेडिकल कलेज(जीएमसी) पोखरामा स्वास्थ्य सेवामा १० देखि २० प्रतिशतसम्म छुट पाउने भएका छन्।  भीरकोट- १  बयरघारीमा रहेको शुभ लक्ष्मी सहकारी  र गण्डकी मेडिकल कलेज पोखराबीच जेठ २८ गते बिहीबार सम्झौता पत्रमा हस्ताक्षर भएसँगै शुभलक्ष्मीका सदस्यहरूले उपचारमा छुट  पाउने भएका हुन् ।

सहकारीका शेयर सदस्यहरूलाई विभिन्न स्वास्थ्य सेवामा सहुलियत प्रदान गर्ने उद्देश्यले बिहिबार यी दुई संस्थाबीच गण्डकी मेडिकल कलेज पोखरामा सो सम्झौतापत्रमा हस्ताक्षर भएको मेडिकल कलेजका सुचना अधिकारी कृष्ण पौडेलले जानकारी दिनुभयो। सुचना अधिकारी पौडेलका अनुसार सो सम्झौतापत्रमा गण्डकी मेडिकल कलेजको तर्फबाट प्रमुख कार्यकारी अधिकृत तथा प्राचार्य डा. रविन्द्र प्रसाद श्रेष्ठ  र शुभ लक्ष्मी बचत तथा ऋण सहकारी संस्थाको तर्फबाट अध्यक्ष भक्त बहादुर के सी ले हस्ताक्षर गर्नुभएको छ  ।

सम्झौता अनुसार सहकारीका सदस्यहरूले रजिष्ट्रेसन शुल्कमा २० प्रतिशत, बहिरंग  सेवा अन्तर्गत ल्याब, एक्सरे,इसीजी,युएसजी, सीटी स्क्यान र एमआरआई सेवामा १० प्रतिशत, अन्तरंग सेवा अन्तर्गत बेड चार्जमा १० प्रतिशत, दन्त सेवामा १५ प्रतिशत छुट पाउने सहकारीका व्यवस्थापक  लेख बहादुर के.सी. (किरण) ले जानकारी  दिनुभयो ।

सम्झौता अनुसार सहुलियत प्राप्त गर्नका लागि सेवाग्राहीले सहकारी संस्थाबाट प्रमाणित परिचयपत्र (आईडी कार्ड) वा आवश्यक भेरिफिकेसनसहित उपस्थित हुनुपर्ने  छ । प्रमाणित परिचयपत्र (आईडी कार्ड) वा आवश्यक भेरिफिकेसन भएका सेवाग्राहीलाई गण्डकी मेडिकल कलेजले गुणस्तरीय स्वास्थ्य सेवा तथा निर्धारित सहुलियत उपलब्ध गराउने  छ ।