आँधिखोला गाउँपालिकाद्वारा नीति तथा कार्यक्रम सार्वजनिक

कृषि, पर्यटन, साना उद्यमशीलता र दिगो विकासलाई मुख्य प्राथमिकता दिँदै स्याङ्जाको आँधिखोला गाउँपालिकाले आगामी आर्थिक वर्ष २०८३/८४ को नीति तथा कार्यक्रम सार्वजनिक गरेको छ। गाउँपालिकाको १९ औं गाउँसभामा अध्यक्ष विश्वनाथ पौडेल सार्वजनिक गरेको नीतिमा कृषि क्षेत्रलाई आत्मनिर्भर बनाउन र युवाहरूलाई उद्यमशीलतामा जोड्न विभिन्न नवीन कार्यक्रमहरूलाई अघि सारिएको छ।

'एक वडा, एक मुख्य उत्पादन' को अवधारणालाई प्रभावकारी बनाउन नीतिमा विशेष व्यवस्था गरिएको छ। जसअन्तर्गत उन्नत बीउबिजन, मल, र कृषि प्रविधिको विस्तारमा लगानी बढाइनेछ। गाउँपालिकाले कृषि अनुदान र तालिमलाई उत्पादनसँग जोड्ने र युवाहरूलाई कृषिमै भविष्य खोज्न प्रोत्साहित गर्ने लक्ष्य राखेको छ। पशुपालन र तरकारी खेतीको विस्तारका साथै शीतभण्डार र बजारीकरणलाई पनि प्राथमिकतामा राखिएको छ।

उद्यमशीलता र रोजगारीको अवसर सिर्जना गर्न गाउँपालिकाले विशेष कार्यक्रम ल्याएको छ। 'युवा स्वरोजगार कार्यक्रम' मार्फत बिना धितो वा सहुलियत दरमा कर्जा र सीपमूलक तालिम उपलब्ध गराई युवाहरूलाई स्थानीय स्तरमै साना तथा घरेलु उद्योग स्थापना गर्न प्रेरित गरिनेछ। यसले स्थानीय उत्पादनको प्रवर्धनका साथै रोजगारीको दर बढाउने अपेक्षा गरिएको छ। नीतिमा पर्यटन र लघु उद्यमशीलतालाई पनि जोडेर नयाँ गन्तव्यहरूको पहिचान र स्थानीय संस्कृतिको प्रवर्धन गर्ने योजना समावेश छ।

शिक्षा र स्वास्थ्य क्षेत्रको सुधार पनि गाउँपालिकाको प्रमुख एजेण्डा रहेको छ। सामुदायिक विद्यालयको गुणस्तर अभिवृद्धि, प्राविधिक शिक्षाको पहुँच विस्तार, र प्रत्येक वडामा आधारभूत स्वास्थ्य सेवाको सहजता सुनिश्चित गरिनेछ। स्वास्थ्य शिविर र महिला लक्षित स्वास्थ्य कार्यक्रमहरूलाई निरन्तरता दिइनेछ।

दिगो पूर्वाधार विकास र वातावरण संरक्षणका लागि गाउँपालिकाले ठोस योजना ल्याएको छ। सडक, खानेपानी, र सिँचाइ जस्ता भौतिक पूर्वाधारको निर्माणका साथै वन जंगल संरक्षण, जैविक विविधता, र फोहोरमैला व्यवस्थापनमा विशेष जोड दिइनेछ। प्रविधिको प्रयोगलाई बढावा दिँदै गाउँपालिकाका सेवाहरूलाई पारदर्शी र उत्तरदायी बनाउने संकल्प गरिएको छ।

आँधिखोला गाउँपालिकाको यो नीति तथा कार्यक्रमले कृषि, उद्यमशीलता, र सुशासनलाई मूल मन्त्र मानेको छ। स्थानीय स्रोतको अधिकतम परिचालन र जनताको सहभागितामा आधारित यस नीतिले समग्र गाउँपालिकाको समृद्धिमा महत्त्वपूर्ण योगदान पुर्‍याउने विश्वास गरिएको छ। गाउँसभाले नीति तथा कार्यक्रमलाई सर्वसम्मत पारित गरेको गाउँपालिका अध्यक्ष पौडेलले जानकारी दिनुभएको छ।