जिप दुर्घटनामा १  एक जनाको मृत्यु, १८जना घाइते

स्याङ्जाको वालिङ नगरपालिका–७ लभ्लिडाँडा स्थित मिर्दी–चापाकोट सडकखण्डमा शुक्रबार बिहान बोलेरो जिप दुर्घटना हुँदा एक जनाको मृत्यु भएको छ भने चालकसहित १८ जना घाइते भएका छन्।

प्रहरीका अनुसार  शुक्रबार बिहान ताप्केबाट वालिङतर्फ आउँदै गरेको BAA ७९०५ नम्बरको डबल क्याप बोलेरो जिप चालकले नियन्त्रण गुमाउँदा सडकछेउमा पल्टिएको हो। दुर्घटनामा जिपमा सवार करिब १९ जनामध्ये ३ जना गम्भीर घाइते भएका छन्।

चालक वालिङ नगरपालिका–७ निवासी २८ वर्षीय मिनबहादुर सारू सामान्य घाइते भएका छन्। उनलाई प्रहरीले नियन्त्रणमा लिएको छ। दुर्घटनामा वालिङ नगरपालिका–७ निवासी २५ वर्षीय राजेन्द्र बिरकट्टाको प्राथमिक स्वास्थ्य केन्द्र वालिङमा उपचारका क्रममा दिउँसो १ बजे मृत्यु भएको चिकित्सकले घोषणा गरेका छन्। उनको शव प्राथमिक स्वास्थ्य केन्द्र वालिङमा राखिएको छ।

गम्भीर घाइते हुनेहरूमा वालिङ–७ की ४६ वर्षीया रुपकला सारू, रुपन्देहीको गैडाहवा गाउँपालिका–४ की ५५ वर्षीया सुमित्रा गुरुङ तथा नवलपरासी (पूर्व) कावासोती नगरपालिका–५ की ४१ वर्षीया मायादेवी सुनारी रहेका छन्।

मध्यम घाइते हुनेहरूमा १२ वर्षीया कर्मिसा सुनारी, ४५ वर्षीया जैकला सारू, २० वर्षीया रुक्सना थापा, ४६ वर्षीया कमला थापा, ३९ वर्षीय टोपबहादुर थापा, ४९ वर्षीया गौमाया सारू, ५९ वर्षीय बेलबहादुर आले, ३० वर्षीय कुमार सारू तथा ३८ वर्षीया ज्ञानुमाया सारू लगायत रहेका छन्।

प्रहरीका अनुसार दुर्घटनामा घाइते भएका १८  जनालाई  नै थप उपचारका लागि पोखरा रिफर गरिएको छ। दुर्घटनाको कारणबारे प्रहरीले थप अनुसन्धान गरिरहेको जिल्ला प्रहरी कार्यालयका सूचना अधिकारी रमेशदत्त अवस्थीले जानकारी दिनुभयो।