अर्जुनचौपारीमा दुग्ध चिस्यान केन्द्र सञ्चालन 

अर्जुन चौपारी गाउँपालिका –१ बजारमा पालिकामै पहिलो पटक दुग्ध चिस्यान केन्द्र सञ्चालनमा ल्याइएको छ । भैसी पालक किसानलाई आर्थिक रुपमा सवल बनाउने उदेश्यले जन विकास साना किसान कृषि सहकारी संस्था लिमिटेडको पहलमा चिस्यान केन्द्र सञ्चालनमा ल्याइएको हो । 

गण्डकी प्रदेश कृषि भूमि ब्यवस्था सहकारी मन्त्रालय पशुपन्छी अनुदान विकास तथा प्रशिक्षण केन्द्र पोखराको ९० प्रतिशत आर्थिक अनुदान सहयोगमा चिस्यान केन्द्र थालनी गरिएको हो । यहाँ प्रशिक्षण केन्द्र पोखराले ४ लाख ७२ हजार पाँच सय लगानी गरेको हो भने सहकारीले ५२ हजार पाँच सय साझेदारी गरेको हो । 

चिस्यान केन्द्रमा पाँच सय लिटरको मिल्क चिलिङ्ग जडान गरिएको छ भने मिल्क एनलाईजर साथै प्रिन्ट, मिल्क क्यान र सेन्ट्री फ्युट मेशिन आयोजनामा खरिद गरेर प्रयोगमा ल्याइएको छ । चिस्यान केन्द्रमा फयाट र लेक्टोको मात्रा हेरेर कृषकलाई दुधको मुल्य तोकिने छ । 

चिस्यान केन्द्र सञ्चालनका क्रममा गाउँपालिका अध्यक्ष प्रकाश तिवारीले चिस्यान केन्द्रमा कृषकले कम रकम पाउने त्यसको पुर्तिको लागि पालिकाले एक महिनामा कृषकलाई उत्पादन हेरेर उत्पादनमा अनुदान दिने बताए  । उनले सहकारी मार्फत उन्नत जातका भैसी खरिदमा लिएको ऋणको ब्याजमा ५० प्रतिशत अनुदान दिने बताए । 

पालिकामै राज्यको सहयोग मिल्क चिस्यान केन्द्रको भवन बनेपनि प्रयोगमा ल्याउन नसकेको बताउदै तिवारीले काम थालनी गर्न सजिलो भएपनि निष्कर्षमा निकाल्न सहज नभएको बताए। दुग्ध चिस्यान केन्द्रलाई अब डेरीको रुपमा बिस्तार गर्नुपर्ने बताउदै तिवारीले कृषकका हरेक समस्यामा पालिकाले साझेदारी गर्ने बताए  । 

कार्यक्रममा वडा नं –१ का अध्यक्ष रण बहादुर थापा, वडा नं –२ का अध्यक्ष धन बहादुर गुरुङ, वडा नं–३ का अध्यक्ष शोभाकान्त काफ्‌ले, पालिका कृषि प्रमुख डोलराज गैरे, सहकारी ऋण उपसमिति संयोजक तारापती पौडेल, सदस्य नारायण काफ्‌ले, लगायतले मन्तब्य राखेका थिए । 

सहकारीले कृषकलाई सात प्रतिशत ऋण दिएसँगै कृषक भैसी पालनमा लागेको र चिस्यान केन्द्र सञ्चालनले सार्थकता पाएको सहकारीका अध्यक्ष खडानन्द पौडेलले बताए। चिस्यान केन्द्रको सञ्चालनका पहिलोा दिन कृषकले ४८.५ लिटर संकलन गरको अध्यक्ष पौडेलले जानकारी दिए ।