स्व. नेता पंगेनीको सम्मानमा निर्माणाधीन प्रवेशद्वार निर्माण रोक्न प्रशासनमा उजुरी

नेपाली काँग्रेसका  स्वर्गीय नेता कमल पंगेनीको सम्मानमा भीरकोट नगरपालिका वडा नं १ र ६ जोड्ने पक्की पुलको मुखमा निर्माणाधिन प्रवेशद्वार तथा शालिक निर्माण कार्य रोक्न माग गर्दै जिल्ला प्रशासन कार्यालय स्याङ्जामा उजुरी परेको छ।

भीरकोट नगरपालिका–१ स्थित बयरघारी हुँदै सुन्दरबजार–मोहनडाँडा–ठूलीभञ्ज्याङ हुँदै पर्वत जोड्ने  सडकको नामाकरण कमल पंगेनी लोकमार्ग गरिएको र उक्त सडकमा  पंगेनीकै सम्मानमा प्रवेशद्वार निर्माण गरी शालिकसमेत राख्ने उद्देश्यले काम सुरु गरिएको भन्दै त्यसलाई रोक्न माग गरिएको हो।

भीरकोटमा क्रियाशील नेपाली काँग्रेस इतरका विभिन्न राजनीतिक दलका प्रतिनिधिहरूले संयुक्त रूपमा प्रमुख जिल्ला अधिकारी निराजन घिमिरे समक्ष निवेदन दिँदै उक्त निर्माण कार्य गैरकानुनी तथा सडकको मापदण्ड र कार्यविधिविपरीत रहेको दाबी गरेका छन्। उनीहरूले निर्माण कार्य तत्काल रोक्न प्रशासनसँग माग गरेका छन्।

निवेदनमा निर्माण कार्य रोक्न  सर्वदलीय बैठकबाट निर्णयसमेत गरिएको उल्लेख गर्दै उक्त निर्णयको प्रतिलिपि संलग्न गरिएको जनाइएको छ।

संयुक्त निवेदनमा राष्ट्रिय स्वतन्त्र पार्टीका नगर अध्यक्ष  मिनबहादुर केसी, नेपाली कम्युनिस्ट पार्टीका जिल्ला सचिव  मिनप्रसाद कोइराला, नेकपा एमालेका जिल्ला कमिटी सदस्य विश्वनाथ अर्याल, राष्ट्रिय प्रजातन्त्र पार्टी नेपालका नगर अध्यक्ष  हर्कबहादुर रोकाहा, राष्ट्रिय स्वतन्त्र पार्टीका उपसभापति  बसन्त अर्याल, नेपाली कम्युनिस्ट पार्टीका प्रदेश कमिटी सदस्य  नुर हक मियाँ र  रास्वपाका गण्डकी प्रदेश सदस्य राजन सुनारलगायतले हस्ताक्षर गरेका छन्।

राष्ट्रिय स्वतन्त्र पार्टीका नगर उपसभापति  वसन्त अर्यालले सडकको नामाकरण र प्रवेशद्वार निर्माण कार्य अवैध भएको  र सत्तारूढ दल नेपाली काँग्रेसले एकलौटी तरिकाले निर्माण गरेकाले निर्माण रोक्न र नामाकरण विरूद्ध प्रशासनमा लिखित उजुरी दिइएको बताए।

उनीहरूले सडकको मापदण्ड तथा प्रचलित कानुनी व्यवस्था पालना नगरी निर्माण अघि बढाइएको भन्दै प्रशासनबाट आवश्यक कारबाही गरी निर्माण रोक्न माग गरेका हुन्। निवेदनको बोधार्थ जिल्ला समन्वय समिति स्याङ्जा, जिल्ला प्रहरी कार्यालय स्याङ्जा र भीरकोट नगरपालिका कार्यालयलाई समेत दिइएको छ।