फेदीखोला गाउँपालिकामा बन्यो नयाँ प्रशासकीय भवन

स्याङ्जाको फेदीखोला गाउँपालिकामा आधुनिक सुविधा सम्पन्न नयाँ प्रशासकिय भवन बनेको छ । गाउँपालिका स्थापना भएको ९ वर्षपछि  गाउँपालिकाले आफ्नै अत्याधुनिक प्रशासकीय भवनबाट सेवा प्रवाह गर्न थालेको छ। भवन निर्माण सुरू भएको ४ वर्षमा  नयाँ कार्यालय भवनले पूर्णता पाएको हो।   भवन स्थानीय तह भवन निर्माण कार्यक्रमको ६० प्रतिशत र गाउँपालिकाको ४० प्रतिशत अर्थात् ८ करोड ५२ लाख २९ हजार लागतमा भवन निर्माण गरिएको हो । 

पाँच नगरपालिका र छ गाउँपालिका रहेको स्याङ्जामा फेदीखोला गाउँपालिकाको भवन नै अन्तिम प्रशासकीय भवन हो । संघीयता भन्दा पहिलाका तीन नगरपालिका पुतलीबजार, चापाकोट र वालिङ  नगरपालिकाले पहिल्यै बनेका भवन प्रयोग गरेका छन् भने संघीयतासँगै बनेका दुई नगरपालिका र पाँच गाउँपालिकाले यसअघि भवन निर्माण गरिसकेका छन् ।

किराँतेश्वर कन्स्ट्रकसन एण्ड डिलिङ कम्पनी काठमाडौँले दुई बर्षमा सक्ने गरेर २०७७ फागुन ६ गते भवन निर्माणको सम्झौता गरेको थियो । गाउँपालिका इन्जिनियर तारानाथ पौडेलले निर्माण कम्पनीले दुई पटक म्याद थपेर दुई बर्ष म्याद गुजारेर भवन निर्माण सकेको बताउनुभयो । 

निर्माण सकिएपनि निर्माण कम्पनीले एक करोड ३४ लाख ६१ हजार ८६८ रुपियाँ लिन बाँकी रहेको छ । रकमको अभाब र निर्माण कम्पनीको ढिला सुस्तिले निर्माण ढिलो भएको हो भने निर्माण ढिलाईको दुई महिनाको जरिवाना लिने तयारी पालिकाले गरेको समेत बुझिएको छ । फेदीखोलाको प्रशासकीय भवन जिल्लामै बनेका पालिका र  सरकारी कार्यालयमा एक मात्र लिफ्ट सहितको भवन हो ।

पालिकाको प्रशासकीय भवन  तीन रोपनीमा क्षेत्रफलमा बनेको  छ भने कम्पाउण्ड सहित प्रशासकीय भवन  १० रोपनी  क्षेत्रफलमा फैलिएको छ । पाँच तलामा रहेको भवनको अण्डर ग्राउण्डमा पार्कीङ भवन, विद्युत भवन रहेको छ भने अन्य चार तला रहेको भवनमा ३५ कोठा, दुई हल, लिफ्ट, १९ वटा शौचालय र एक अपाङ्गमैत्री शौचायल समेत बनाइएको छ । 

पालिका अध्यक्ष घनश्याम सुवेदीले नौ बर्ष साविक फेदीखोला गाविसको भवन मर्मत गरेर सेवा दिएकोमा भवन बनेसँगै अब आफ्नै भवनबाट सेवा प्रवाह   थालेको बताउनुभयो । पालिकाले आफ्नै भवनबाट जेठ १७ गतेबाट दिन थालेपनि निर्माण कम्पनीले औपचारिक रूपमा हस्तान्तरण भने गरेको छैन् ।