उत्कृष्ट कृषकहरूलाई सम्मान

भीरकोट नगरपालिकाले उत्कृष्ट कृषकहरूलाई सम्मान गरेको छ।  नगरपालिकाले  कृषि पेशामा आवद्ध कृषक, कृषक समूह, निजी व्यवसायी तथा कृषि फर्महरूलाई प्रोत्साहन स्वरूप “उत्कृष्ट कृषक सम्मान कार्यक्रम” अन्तर्गत ९ जना कृषकहरूलाई नगद पुरस्कार सहित सम्मान गरेको हो। 

आर्थिक वर्ष २०८१/८२ को स्वीकृत वार्षिक कार्यक्रमअनुसार कृषकहरूबाट प्राप्त  आवेदन अनुसार सम्मान  गरिएको प्रमुख प्रशासकीय अधिकृत उदयबहादुर पराजुलीले जानकारी दिनुभयो।   १८ जना कृषकहरूले आवेदन दिएकोमा विधागत रूपमा ९ जना कृषकहरू सम्मानित भएका हुन्।

गाई पालन तर्फ कमला गोदार , भैसी पालन तर्फ शिव बहादुर खत्री क्षेत्री, बाख्रा पालन तर्फ भेमराज रेग्मी,  फलफूल खेती तर्फ शालिग्राम अर्याल र श्याम प्रसाद अर्याल, खाद्यन्न/ नगदे बाली तर्फ ननिता अर्याल (राना) , तरकारी खेती तर्फ लोक बहादुर खत्री, फलफूल नर्सरी  कृष्ण बहादुर अधिकारी र कृषि क्षेत्रमा गरिएको नवीनतम कार्य तर्फ डिल बहादुर गुरूङ गरि ९ जना उत्कृष्ट  कृषकहरूलाई पुरस्कृत गरिएको नगर प्रवक्ता दिपेन्द्र के.सी. ले जानकारी दिनुभयो।उहाँका अनुसार कृषकहरूलाई १० हजार रूपैयाँ नगद पुरस्कारसहित सम्मान गरिएको हो।