फेरिदैं अर्जुनचौपारी, ग्रामीण सडक धमाधम कालोपत्रे 

अर्जुनचौपारी गाउँपालिकामा ग्रामीण सडकहरू धमाधम कालोपत्र भैरहेको छ।  स्थानीय पूर्वाधार विकास अन्तर्गत प्रत्येक वडामा ग्रामीण सडक कालोपत्रे गर्ने कामलाई तिब्रता दिइएको गाउँपालिका अध्यक्ष प्रकाश तिवारीले जानकारी दिनुभयो ।

संघीयता पश्चातको  पहिलो पाँच बर्षमा कालोपत्रे शुन्य रहेको यहाँ पछिल्लो तीन वर्षमा २५ किमी कालोपत्रे भएको छ। पूर्वाधारको पनि पूर्वाधार मानिने   सडक पूर्वाधारलाई अर्जुनचौपारी गाउपालिकाले पालिकाकै बजेटवाट कालोपत्रे अभियान चलाएको छ।

 गाउँपालिकाले आफ्नै आन्तरीक श्रोत र बजेट प्रयोगमा १८ किमी कालोपत्रे गरेको छ भने प्रदेश सरकार र शहरी विकास मन्त्रालय  मार्फत ७ किमी कालोपत्रे भएको छ । गाउँपालिका अध्यक्ष प्रकाश तिवारीले पालिकाले आब २०८१/८२ मै १० करोडको लागतमा सात किमी कालोपत्रे गरेको बताउनुभयो । 

हरेक वडाका मुख्य सडकलाई कालोपत्रे गर्ने लक्ष्य सहित आफ्नो कार्यकालको पहिलो बर्षमा ५ कि.मी. कालोपत्रे र दोस्रो बर्षमा ६ किमी कालोपत्रे गरेको बताउनुभयो । गत आबको बहुबर्षीय योजना अन्तर्गत पाँच किमी सडक  कालोपत्रेका काम तिब्र रुपमा अगाडि बढेको तिवारीले बताउनुभयो । 

भौगोलिक दुर दराजका स्थानीयलाई कृषि, शिक्षा, स्वास्थ्यको क्षेत्रमा सहज गराउने उद्देश्यले ग्रामीण सडक कालोपत्रे गरिएको हो । पालिकाको छ वटै वटामा कालोपत्रे सडक पुर्‍याउने लक्ष्य अनुरुप वडा नं –१, २ र ३ मा कालोपत्रे भएको छ भने वडा नं –४ र ६ मा टेण्डर भएर काम भैरहेको छ भने वडा नं –५ मा आधा कालोपत्रे पुगेको छ भने अबको डेढ बर्षमा कालोपत्रे पुग्ने छ । 

पालिले तीन बर्षमा सडक पूर्वाधारमा मात्रै ३० करोड लगानी गरेको हो । यस्तै पूर्वाधारले हेलु अर्जुन चौपारी चार किमी सडक कालोपत्रे गर्दा शहरी विकासले अर्जुन चौपारी बजार क्षेत्र हुँदै पुतलीबजार दुई किमी कालोपत्रे गरेको हो । यस्तै पूर्वाधारले दरौ खण्डका पाँच सय मिटर, दारेगौडा सडक, रैते सडक एक किमी कालोपत्रे गरेको हो । 

सडक कालोपत्रे भएसँगै लामडाँडा, रापाकोट, दरौँ, आरुचौर लगायतका दर्जनौ गाउँका स्थानीयलाइ आवत जावतमा  मात्र नभई कृषि उत्पादन बिक्री तथा बिरामी पर्दा अस्पताल जानका लागी सहज भएको हो ।गाउँपालिका, प्रदेश तथा शहरी विकासले कालोपत्रे गर्दा सिद्धार्थ राजमार्गको हेलु देखी अर्जुनचौपारी, घन्टे हुदै बाग्लुङ सम्मका नागरिकलाई टेवा पुग्ने देखिन्छ ।