चुनावी प्रतिबद्धता अनुसार फेदिखोलामा दुई नयाँ पुल निर्माण 

स्याङ्जाको फेदीखोला गाउँपालिकामा दुई नयाँ पुल निर्माण सम्पन्न भएका छन्।  गाउँपालिकाको वडा नं २ मा  लामाचौर–स्थानचौर र लामाचौर–चनौटे जोड्ने दुई नयाँ पुलहरू मंगलबारदेखि  सञ्चालनमा ल्याइएको हो ।

लामाचौर–चनौटे जोड्ने ९० मिटर को झोलुङ्गे पुल ७५ लाख ४३ हजार १ सय ७० रुपैयाँ ३४ पैसाको लागतमा सम्पन्न भएको उपभोक्ता समितिका अध्यक्ष एकनारायण गौतम (रामु) ले जानकारी दिनुभयो । यसैगरी लामाचौर–स्थानचौर जोड्ने ३२ मिटरको ट्रस पुल ३३ लाख ४८ हजार २ सय  ५ रुपैयाँ रूपैयाँ ६३ पैसाको  लागतमा निर्माण गरिएको उपभोक्ता समितिका अध्यक्ष टंक प्रसाद गौतमले जानकारी दिनुभयो।  पुल निर्माणमा प्राविधिक सहयोग अन्धाअन्धी सामुदायिक विकास केन्द्रले प्रदान गरेको थियो ।

पुल उद्घाटन गर्दै  गाउँपालिका अध्यक्ष घनश्याम सुवेदीले चुनावमा स्थानीय जनतासँग गरिएको प्रतिबद्धता अनुसार पुल निर्माण भएको बताउनुभयो। स्थानीय विकासमा जनसहभागिता नै मुख्य आधार भएको बताउँदै अध्यक्ष सुवेदीले  स्थानीयको आशा र अपेक्षा अनुसार चुनावी प्रतिबद्धता पूरा गर्न पाएकोमा खुशी व्यक्त गर्नुभयो। 

पुल उद्घाटन कार्यक्रममा गाउँपालिका उपाध्यक्ष देऊ कुमारी गुरुङ,अन्धा अन्धी सामुदायिक विकास केन्द्रका कार्यालय प्रमुख  एकनारायण सापकोटा,वडा नं २ का अध्यक्ष अविलाष गुरुङ, समाजसेवी,उपभोक्ता,आमा समुह,स्थानियहरुको रहेको  थियो।

गाउँपालिकाले पुलहरूको नियमित अनुगमन र मर्मतका लागि समिति समेत गठन गरेको छ । लामाचौर–स्थानचौर ट्रस पुलका लागि गंगा प्रसाद गौतम संयोजकत्वमा ५ सदस्यीय समिति, र लामाचौर–चनौटे सस्पेन्सन बृजका लागि इमानसिंह गोदार संयोजकत्वमा ७ सदस्यीय समिति बनाइएको छ ।