विद्यालयले रोप्यो ६ क्वीन्टल आलु

पुतलीबजार नगरपालिका वडा नं  १३ मा अवस्थित कालिका माध्यामिक विद्यालयले आलु खेती गरेको छ । कृषि विकास कार्यालय स्याङ्जाले विद्यालयलाई अनुदानमा आलुको बिउ उपलब्ध गराएपछि विद्यालयले ६ सय १० किलो आलुको बीउ रोपेको हो । विद्यालयले कृषि विकास कार्यालयको बाली विकास कार्यक्रम अन्तर्गत अनुदानमा प्राप्त जनकदेव, खुमल रातोलगायतका जातको आलु लगाएको हो ।

विद्यालयले गतवर्ष ५१ हजार रुपैँयाको मकै र ६६ हजार ६ सय ५५ रुपैँयाको धान बिक्रि गरेएको विद्यालय व्यवस्थापन समितिका अध्यक्ष मिनप्रसाद कोईरालाले बताउनुभयो । विद्यालयले करिब ७ रोपनी जग्गा लिजमा लिएर विगत ३ वर्षदेखि आलु , धान, मकै लगायतका  खेतिबाली गर्दै आएको छ । यस्तै , विद्यालयको ६० रोपनी जग्गा मध्येको जग्गामा गतवर्ष ३ सय सुन्तलाका बिरुवा लगाईएको छ भने अर्को वर्ष थप दुई सय गरेर ५०० सुन्तलाका विरुवाहरु लगाउने योजनामा विद्यालय अगाडि बढेको अध्यक्ष कोईरालाले बताउनुभयो । 

कृषि क्षेत्रमा अब्बल कोईराला विद्यालय व्यवस्थापन समितिको अध्यक्षमा निर्वाचित भएपछि विद्यालयमा कृषिका कार्यहरु हुँदै आएका छन् । यसरी विद्यालयले कृषिका क्षेत्रमा काम गर्दा विद्यार्थीलाई प्रयोगात्मक ज्ञान समेत हुने र विद्यालयलाई आम्दानीको स्रोत बढ्ने अध्यक्ष कोईरालाले बताउनुभयो । कृषिबाट आएका पैसा विद्यालयले विद्यालयकै अतिरिक्त क्रियाकलापहरुमा खर्च गर्ने गरेको छ ।

पुतलीबजार र भीरकोटको सिमानामा रहेको विद्यालयमा भीरकोट, अर्जुनचौपारी र पुतलीबजारका सिमान्तकृत, माझी, दलित, विपन्न परिवारका विद्यार्थीहरु अध्ययनरत छन् । विद्यालयमा ५ सय ७० जना विद्यार्थी अध्ययनरत छन् । विद्यालयले उत्पादन गरेका उपजहरु विद्यालय परिवारभित्रै अभिभावक तथा शिक्षकहरु र स्थानीयले किन्ने गरेका छन् । विद्यालयलाई निकट भविष्यमै नमुना विद्यालयको रुपमा विकास गर्ने लक्ष्यका साथ अगाडि बढेको अध्यक्ष कोइरालले बताउनुभयो ।