महामन्त्री थापाद्वारा नवग्रह दर्शन

नेपाली कांग्रेसका महामन्त्री एवं सांसद गगनकुमार थापाले स्याङ्जाको अर्जुनचौपारीमा रहेको नेपालकै पहिलो नवग्रह मन्दिरको दर्शन  एवं पूजाआजा गर्नुभएको छ। महामन्त्री थापाले नवग्रह मन्दिरसँगै रहेको षट्कोण शिवालयमा रहेका पशुपतिनाथको जस्तै पञ्चमुखी शिवलिङग र कोणमा रहेका गणेश, कुलदेवता, लक्ष्मी, कालभैरव, हनुमानको मूर्तिमा पूजापाठ गर्नु भएको थियो । थापाले षट्कोण शिवालयमा पूजापाठसँगै पञ्चकन्याको मन्दिरमा पुगेर पूजा गर्नु भएको थियो भने त्यो सँगै नवग्रहको नौघेरामा घुमेर बाहिर निस्कनु भएको थियो । नवग्रहमन्दिर देशकै पहिलो र नयाँ धार्मिक पर्यटनको गन्तब्य भएको बताउँदै महामन्त्री थापाले यसको विकासमा आफूले सक्दो सहयोग गर्ने बताउनुभयो ।

नवनिर्मित धार्मिक पर्यटकीय दर्शन गर्न पाउँदा  खुसी व्यक्त गर्दै महामन्त्री थापाले यसको परिकल्पना गरेर नेपालमै पहिलो पटक नवग्रह मन्दिर निर्माण गर्न सफल भएकोमा पालिका अध्यक्ष प्रकाश तिवारीलाई धन्यवाद दिनुभएको थियो।  

नवग्रह मन्दिर देशकै महत्त्वपूर्ण धार्मिक पर्यटकीय गन्तव्य बन्नु गौरवको विषय भएको बताउँदै उहाँले पर्यटन प्रवर्धन र धर्मसंस्कृतिको रक्षार्थ पालिकाले खेलेको भूमिकाको प्रशंसा गर्नुभएको थियो।थापासँगै नवग्रह मन्दिरको दर्शनमा नेपाली कांग्रेस स्याङ्जाका सभापति एवं सङ्घीय सांसद राजु थापा, नेपाली कांग्रेस स्याङ्जाका कार्यवाहक सभापति केदार काफ्ले, विभिन्न पालिकाका प्रमुख  प्रकाश तिवारी र उपप्रमुख सपना गुरूङ  लगायतका व्यक्तिहरू सहभागी हुनुहुन्थ्यो।

नवग्रह मन्दिरको दर्शनपछि महामन्त्री थापा   जिल्लाका नेता कार्यकर्तासहित  आँधिखोला गाउँपालिकामा अवस्थित दक्षिण एसियाकै पहिलो  होमस्टे सिरुबारी  जानुभएको थियो। उहाँलाई होमस्टेमा भव्य स्वागत गरिएको थियो।