दरौँ सिरुबारीमा साभ नेपालको दुई दिने विशेष प्रशिक्षण ; २५ सहभागी दीक्षित

स्याङ्जाको प्रसिद्ध पर्यटकीय गन्तव्य दरौँ सिरुबारीमा 'साभ नेपाल' को आयोजनामा दुई दिने विशेष आवासीय प्रशिक्षण कार्यक्रम भव्य रूपमा सम्पन्न भएको छ। संस्थाबाट अनलाइन तालिम लिइरहेका करिब २५ जना सहभागीहरूको सीप र क्षमता अभिवृद्धि गर्ने उद्देश्यले आयोजित यस कार्यक्रमको मुख्य नारा 'जीवनको मूल्य: तनाव व्यवस्थापन र प्रयोगात्मक अभ्यास' रहेको थियो।

कार्यक्रमको प्रमुख प्रशिक्षकका रूपमा साभ नेपालका अध्यक्ष एवम मनोपरामर्शदाता डा. तुलसी प्रभास खनालले तनाव व्यवस्थापनका वैज्ञानिक विधिहरू र दैनिक जीवनमा यसको प्रयोगात्मक अभ्यासबारे गहन प्रशिक्षण दिएका थिए। त्यसैगरी, वरिष्ठ रेकी हिलर मुक्त खवासले 'रेकी हिलिङ' र ध्यानका माध्यमबाट मानसिक तथा शारीरिक स्वास्थ्य कसरी सुदृढ बनाउने भन्ने विषयमा प्रयोगात्मक प्रशिक्षण दिए।

दुई दिनसम्म चलेको यो प्रशिक्षण अनलाइन विद्यार्थीहरूका लागि एक महत्त्वपूर्ण पुनर्ताजगी र ज्ञान आदानप्रदानको थलो बनेको थियो।
सुन्दर पर्यटकीय स्थल दरौँ सिरुबारीको शान्त र प्राकृतिक वातावरण, स्थानीय गुरुङ समुदायको न्यानो आतिथ्य, र समृद्ध संस्कृतिले प्रशिक्षणलाई थप स्मरणीय बनाएको सहभागीहरूले अनुभव व्यक्त गरे।

समापन समारोहमा, सबै २५ सफल सहभागीहरूलाई साभ नेपालका तर्फबाट विशेष 'प्रयोगात्मक प्रशिक्षण समापन प्रमाणपत्र' वितरण गरियो। कार्यक्रमको सफलताको बारेमा बोल्दै साभ नेपालका अध्यक्ष डा.  खनालले दरौँ सिरुबारीको  काखमा  व्यावहारिक ज्ञान दिन पाएकोमा खुशी व्यक्त गरे।

भविष्यमा पनि यस्तै व्यावहारिक र आवासीय कार्यक्रमहरू आयोजना गर्ने लक्ष्य रहेको संस्थाले जनाएको छ।