पुतलीबजारमा  बजार अनुगमन, म्याद नाघेका खाद्यवस्तु नष्ट 

पुतलीबजारमा होटल तथा रेष्टुरेण्ट र खाद्य किराना पसलको अनुगमन गरिएको छ। जिल्ला प्रशासन कार्यालय र एकीकृत सेवा कार्यालय स्याङ्जाको संयुक्त आयोजनामा भएको अनुगमनमा खाद्य प्रविधि तथा गुण नियन्त्रण कार्यालय पोखरा, जिल्ला प्रहरी कार्यालय, कोष तथा लेखा नियन्त्रण कार्यालय र राष्ट्रिय उपभोक्ता मञ्चको सहभागिता रहेको थियो।

अनुगमनका क्रममा व्यवसाय दर्ता तथा नवीकरण, वस्तुको मूल्यसूची, नापतौल तथा प्रमाणपत्र, खाद्य वस्तुको लेबल, म्याद, PAN/VAT, बिक्री तथा खरिद बिललगायतका विषयमा निरीक्षण गरिएको थियो। मिठाई पसलमा खाद्य वस्तुको गुणस्तर तथा यसअघि दिइएका निर्देशनको पालना भए/नभएको समेत हेरिएको थियो।

अनुगमनका टोलीले   १२ किराना पसल र  २६ होटल तथा रेष्टुरेन्ट अनुगमन गरेको थियो। अनुगमनका क्रममा  रु. १० हजार ८३० बराबरको म्याद नाघेको तथा खानयोग्य नभएको खाद्य वस्तु नष्ट गरिएको छ। यस घटनाले उपभोक्ताले खाद्य वस्तु खरिद गर्दा म्याद, लेबल, मूल्यसूची र गुणस्तरमा विशेष ध्यान दिनुपर्ने आवश्यकता देखाएको छ।

अनुगमन टोलीले होटल, रेष्टुरेण्ट तथा खाद्य किराना व्यवसायीलाई खाद्य वस्तुको गुणस्तर कायम राख्न, म्याद गुज्रिएका वस्तु बिक्री नगर्न तथा उपभोक्ताको स्वास्थ्य र अधिकारप्रति जिम्मेवार बन्न सचेत गराएको थियो।

व्यवसायीले खरिद तथा बिक्रीका बिल सुरक्षित राख्नुका साथै मूल्यसूची स्पष्ट रूपमा राख्नुपर्ने विषयमा समेत जानकारी दिइएको थियो।