भीरकोटमा महिला  पञ्चेबाजा प्रतियोगिता हुने

स्याङ्जाको भीरकोटमा महिला पञ्चेबाजा प्रतियोगिता हुने भएको छ। एककिकृत सेवा कार्यालय स्याङ्जाको आयोजना र भीरकोट नगरपालिकासँगको समन्वयमा यही मंसिर २४ गते महिला समुहको पञ्चेबाजा प्रतियोगिता आयोजना गरिएको एकीकृत सेवा कार्यालयका प्रमुख जीवन पौडेलले जानकारी दिनुभयो। बयरघारी सिसौघारी स्थित भीरकोट खेलमैदानमा प्रतियोगिता हुने पौडेलले बताउनुभयो।

महिला हिंसा विरुद्धको १६ दिने अभियानको अवसरमा सचेतनामूलक कार्यक्रम र गीत तथा पञ्चेबाजाको संगीत मार्फत् महिला हिंसा विरुद्ध आवाज बुलन्द बनाउन कार्यक्रम आयोजना गरिएको पौडेलले बताउनुभयो। उहाँले प्रतियोगिताले मौलिक संस्कृति जगेर्ना  र महिला आवाज तथा अधिकार स्थापनामा टेवा पुग्ने विश्वास व्यक्त गर्नुभयो। स्याङ्‌जामा "प्रविधिको सही प्रयोग गरौं,  लैङ्गिक  हिंसा अन्त्य गरौं" भन्ने  नाराकाका चलिरहेको १६ दिने अभियानमा अवसरमा विभिन्न सचेतनामुलक कार्यक्रम संचालन भैरहेका छन्।

पञ्चेबाजा प्रतियोगीतामा एउटा  समूहबाट बाद्यबादन, गायन र नृत्यसहित अधिकतम १३ जनाले  सहभागिता जनाउन पाउनेछन्।  महिला अधिकार, नारी जागरण, महिला हिंसा र यसको अन्त्य जस्ता विषयवस्तु समेटेर गीत गाउँदै उक्त गीतको तालमा बाजा बजाउनु पर्ने छ । प्रतियोगिताका विजेताहरूलाई नगद पुरस्कार, मेडल र प्रमाणपत्र प्रदान गरिने र सहभागी सबैलाई यातायात खर्चको समेत  व्यवस्था गरिएको आयोजकले जानकारी दिएको छ।

प्रतियोगितामा सहभागी हुन चाहने महिला समुहले यही मंसिर २० गतेसम्म टिम दर्ता गर्नुपर्ने छ। कार्यक्रममा ख्याति प्राप्त राष्ट्रिय कलाकारद्धारा सांगीतिक प्रस्तुतिको साथै महिला अधिकारकर्मीद्वारा सचेतना कार्यक्रम समेत हुने बताइएको छ। नेपाली मौलिक भेषभूषामा नृत्य समेत प्रस्तुत हुने उक्त कार्यक्रममा र राष्ट्रिय लोकदोहोरी गायक तथा सर्जक लोकनाथ सापकोटा, राष्ट्रिय लोक दोहोरी गायिका तारा पौडेल, पञ्चेवाजा विज्ञ तथा लोकदोहरी गायिका रविना गुरुङ्लगायतले सांगीतिक प्रस्तुति दिने आयोजकले जानकारी दिएको छ।