अध्यक्ष तिवारीलाई 'जेसीआई यूथ अवार्ड' को सम्मान

स्याङ्जा जिल्ला स्थित अर्जुनचौपारी गाउँपालिकाका अध्यक्ष प्रकाश तिवारी जेसीआई (जुनियर च्याम्बर इन्टरनेशनल) यूथ अवार्डबाट सम्मानित हुनुभएको छ।

युवामैत्री नेतृत्व, नवप्रवर्तनशील सोच र स्थानीय तहमा देखाएको प्रभावकारी कार्यसम्पादनको कदर गर्दै जेसीआई नेपालले ५२ औँ राष्ट्रिय महाधिवेशनको उद्घाटन समारोहमा उनलाई उक्त अवार्ड प्रदान गरेको हो । जेसीआई नेपालले प्रत्येक वर्ष विभिन्न क्षेत्रमा अतुलनीय योगदान पुर्‍याएका युवालाई सम्मान गर्दै आएको छ ।

यसअघि पनि तिवारी चर्चित अनलाइन सञ्चारमाध्यम अनलाइनखबरद्वारा प्रकाशित ‘४० मुनिका ४०’ सूचीमा सूचीकृत भई सम्मानित भइसकेका छन् । देशभरका विभिन्न क्षेत्रमा उल्लेखनीय योगदान पुर्‍याएका ४० वर्षमुनिका प्रभावशाली युवालाई समेट्दै उक्त सूची सार्वजनिक गरिँदै आएको छ ।

पहिले गुमनाम र विकासका दृष्टिले पछाडि परेको अर्जुनचौपारी गाउँपालिकालाई राष्ट्रिय स्तरमा चिनाउन तिवारीको नेतृत्व निर्णायक बनेको स्थानीयहरू बताउँछन् । सीमित स्रोत–साधनका बाबजुद स्पष्ट दृष्टिकोण, योजनाबद्ध कार्यान्वयन र जनसहभागितामूलक विकास मोडेलमार्फत उहाँले गाउँपालिकालाई विभिन्न राष्ट्रिय सम्मान र पुरस्कारको योग्य बनाउन सफल हुनुभएको छ।

तिवारी नेपालकै पहिलो नवग्रह मन्दिरका परिकल्पनाकारका रूपमा पनि परिचित छन् । धार्मिक, सांस्कृतिक र पर्यटन प्रवर्द्धनलाई एकीकृत गर्दै अघि सारिएको उक्त अवधारणाले गाउँपालिकाको पहिचान स्थापित गर्नुका साथै आन्तरिक पर्यटन विकासमा उल्लेखनीय योगदान पुर्‍याएको छ । उहाँको कार्यकालमा सुशासनलाई प्राथमिकतामा राख्दै प्रशासनिक पारदर्शिता, डिजिटल सेवा विस्तार र छिटोछरितो सेवा प्रवाहमा सुधार गरिएको छ ।

शिक्षा क्षेत्रमा सामुदायिक विद्यालयको शैक्षिक गुणस्तर उकास्न पहल गरिएको छ भने स्वास्थ्य क्षेत्रमा आधारभूत सेवाको पहुँच विस्तार गरिएको छ । साथै सडक, खानेपानी, भवन निर्माणलगायत भौतिक पूर्वाधार विकासमा पनि उल्लेखनीय प्रगति भएको छ ।

जेसीआई यूथ अवार्डमार्फत प्राप्त सम्मानले स्थानीय तहमा युवाको नेतृत्व, नवीन सोच र प्रतिबद्धताबाट दिगो विकास सम्भव छ भन्ने सन्देश दिएको अध्यक्ष तिवारीले बताउनु भएको छ। उहाँले यस उपलब्धिलाई अर्जुनचौपारी गाउँपालिकावासीले गौरवका रूपमा लिएको र यसले अन्य युवालाई पनि सार्वजनिक सेवामा सक्रिय हुन थप प्रेरणा दिएको उल्लेख गर्नुभयो ।