स्याङ्जा प्रहरीको ‘एक्सन’ : जडीबुटी र ट्याक्टर नियन्त्रणदेखि फरार प्रतिवादी पक्राउसम्म

स्याङ्जा प्रहरीले जिल्लामा हुने अवैध गतिविधि नियन्त्रण तथा अदालतको फैसला कार्यान्वयनमा सक्रियता बढाएको छ। प्राप्त विशेष सूचनाका आधारमा प्रहरीले जडीबुटीको अवैध सङ्कलन, नदीजन्य पदार्थको अवैध उत्खनन र फरार कसूरदार पक्राउ गर्ने कार्यलाई एकैसाथ अघि बढाएको हो। यसै क्रममा भीरकोट नगरपालिका–९, सिर्कोटबाट अवैध रूपमा सङ्कलन तथा भण्डारण गरिएको अन्दाजी २५० केजी ‘चुत्रो’ जातको जडीबुटीसहित ३१ वर्षीय आनन्द बहादुर सार्कीलाई वडा प्रहरी कार्यालय वालिङको टोलीले नियन्त्रणमा लिएको छ। बरामद जडीबुटी र निजलाई आवश्यक कारबाहीका लागि सब–डिभिजन वन कार्यालय वालिङमा बुझाइएको छ।

यसैगरी, नदीजन्य पदार्थको अवैध उत्खनन र ओसारपसार नियन्त्रण गर्ने क्रममा प्रहरीले विभिन्न स्थानबाट ट्याक्टरहरू नियन्त्रणमा लिएको छ। पुतलीबजार–१४ स्थित आँधीखोलाबाट अवैध रूपमा बालुवा–गिट्टी बोकेको ग १ त ४७९३ नम्बरको ट्याक्टरलाई नियन्त्रणमा लिई २० हजार रुपैयाँ जरिवाना गराइएको छ भने भीरकोट–४ सिम्लेमा बालुवा बोकेको ग १ त ७३७१ नम्बरको ट्याक्टरलाई १० हजार रुपैयाँ जरिवाना गरिएको छ। साथै, फेदीखोला–४ मा बालुवा–गिट्टीसहित फेला परेको ग १ त ६४९० नम्बरको ट्याक्टरमाथि कारबाही प्रक्रिया अघि बढाइएको छ।

अदालतको फैसला कार्यान्वयन अभियानअन्तर्गत फरार प्रतिवादीहरूलाई पनि पक्राउ गरिएको छ। चोरी तथा सार्वजनिक अपराध मुद्दामा ५ हजार २३७ रुपैयाँ ५० पैसा जरिवाना भुक्तान गर्न बाँकी पुतलीबजार–१ का ३६ वर्षीय शंकर अधिकारी र नकबजनी चोरी तथा जबरजस्ती चोरी मुद्दामा तीन महिना कैद सजाय भुक्तान गर्न बाँकी पुतलीबजार–१० का तम बहादुर गुरुङलाई नियन्त्रणमा लिई अदालतमा उपस्थित गराइएको जानकारी प्रहरी निरीक्षक सागर कार्कीले दिनुभयो। शान्ति सुरक्षा, वातावरण संरक्षण र कानुन कार्यान्वयनमा प्रहरीले देखाएको यो सक्रियताप्रति स्थानीयले सकारात्मक प्रतिक्रिया जनाएका छन्।