शुभलक्ष्मीले मनायो १३ औं स्थापना दिवस : उपलब्धि र भावी योजना सार्वजनिक

शुभलक्ष्मी बचत तथा ऋण सहकारी संस्था लि. ले आफ्नो स्थापनाको १३ औँ  स्थापना दिवस मनाएको छ।स्थापना दिवसको  अवसरमा संस्थाकै प्राङ्गणमा शुभकामना आदानप्रदान एवं आगामी  उपलब्धि र योजना सार्वजनिक गरेको छ।

स्थापना दिवसको अवसरमा संस्थाले १३ वर्षको यात्रामा हासिल गरेका महत्त्वपूर्ण उपलब्धिहरू र वर्तमान अवस्था सार्वजनिक गरेको छ। जसमा:संस्थामा सदस्यहरूको बचत रकम २२ करोड रुपैयाँ पुगेको छ। यसैगरी सेयर पुँजी २ करोड र जगेडा कोष झन्डै ३ करोड ५० लाख रुपैयाँ पुगेको छ, जसले संस्थाको वित्तीय सबलतालाई देखाउँछ।

भीरकोटलाई दूधमा आत्मनिर्भर बनाउन संस्थाले गाईपालन व्यवसायको सुरुवात गराएको छ। जसअन्तर्गत हाल विभिन्न वडाहरूमा ३०० भन्दा बढी गाई पालन भइरहेका छन् र दैनिक औसत ५०० लिटर दूध उत्पादन भइरहेको छ। संस्थाले करिब २०० जनालाई उद्यमशीलतामा जोडिसकेको छ। लघुवित्त कार्यक्रममार्फत ५०४ जना महिला सदस्यहरू आबद्ध भई नेतृत्व विकास र सीप विकासमा अगाडि बढेका छन्।

संस्थाले आगामी दिनका लागि आकस्मिक ऋण १ लाख रुपैयाँसम्म ,ग्रीन कार्डको व्यवस्था गरी ब्याजमा छुट, स्वास्थ्य तथा पारिवारिक बीमामा आर्थिक योगदान, र भीरकोट तथा अर्जुनचौपारीका ग्रामीण क्षेत्रहरूमा वित्तीय साक्षरता अभियानलाई थप प्रभावकारी बनाउने लक्ष्य राखेको छ।

साथै, संस्थाले आफ्नै व्यावसायिक भवन निर्माण गर्ने र अत्याधुनिक मोबाइल बैंकिङ सेवा प्रदान गर्ने दीर्घकालीन योजना समेत सार्वजनिक गरेको छ। संस्थाले हाल सदस्यहरूलाई बचतमा उच्चतम ब्याज, सहज र सस्तो ब्याजदरमा ऋण, र कारोबारका आधारमा बोनसको सुविधा दिँदै आएको छ।

संस्थाका अध्यक्ष भक्तबहादुर के.सी. को अध्यक्षतामा सम्पन्न भएको उक्त समारोहमा जिल्ला सहकारी सङ्घ स्याङ्जाका अध्यक्ष लक्ष्मीपति पौडेल, जिल्ला बचत तथा ऋण सहकारी संस्था का अध्यक्ष लोकनाथ रेग्मी, को-अपरेटिभ म्यानेजर क्लबका शिव वाग्ले निवर्तमान नगर प्रमुख छायाराम खनाल, भीरकोट उद्योग वाणिज्य संघका अध्यक्ष  नुवादत्त अर्यालको  उपस्थिति रहेको थियो।