१८ हजार अनुदानमा किसानले नै खरिद गरे ट्याक्टर 

स्याङ्जाको भीरकोट नगरपालिकाका किसानहरूले हाते ट्याक्टर खरिदमा १८ हजार  अनुदान पाउने भएका छन्। ९ वटा वडाका ४५ जना कृषकले उक्त अनुदान पाउने नगर प्रवक्ता दीपेन्द्र के.सी. ले जानकारी दिनुभयो। उहाँले  जुनसुकै मूल्य र गुणस्तरको ट्याक्टर खरिद गरेपनि किसानले १८ हजार अनुदान पाउने बताउनुभयो। प्राविधिक कारणवश पालिकाले टेन्डर प्रक्रियाबाट हाते ट्याक्टर खरिद गर्न नसकेपछि किसानले नै ट्याक्टर खरिद गरेका हुन्। 

हाते ट्याक्टर प्राप्तिका लागि कूल १ सय ७७ वटा आवेदन परेकोमा हरेक  वडाले  ५ जना लाभग्राही छनोट गरेका थिए। वडाले छनोट गर्दा हरेक टोलमा १ जना पर्ने गरि र विगतमा अनुदान पाएका कृषक नदोहिरिने गरि गरेको  नगर कृषि शाखा प्रमुख श्रवण कुमार विष्टले जानकारी दिनुभयो। हाते ट्याक्टरमा अनुदानका लागि कूल ९ लाख रूपैयाँ छुट्याइएकाले बजेटको सिमितताका कारण ४५ जना कृषकलाई मात्रै अनुदान दिन लागिएको कृषि शाखाले जनाएको छ।

पेट्रोल इन्जिन भएको ट्याक्टर सस्तो र हलुङ्गो हुने भएकाले किसानहरूले पेट्रोल इन्जिन भएको ७ एचपीको ट्याक्टर खरिद गरेका छन्। किसानहरूले ३६ हजार मूल्यमा खरिद गरेपछि अनुदानका लागि पालिकामा पेश गर्ने वडा नं ६ का अध्यक्ष लक्ष्मण खत्री क्षेत्रीले जानकारी दिनुभयो।

किसानहरूले व्यक्तिगत रूपमा खरिद गर्दा यातायात र ढुवानीमा समेत समस्या हुने  र खरिद मूल्य महङ्गो हुने  भएकाले स्थानीय व्यवसायी प्रदिप थापाले आफ्नो पसल   स्मार्ट कृषि मेसिनरी   मार्फत् किसानहरूलाई बयरघारीबाटै ट्याक्टर खरिद गर्ने व्यवस्था मिलाइदिएको कृषि शाखा प्रमुख विष्टले जानकारी दिनुभयो। यद्यपि वडा नं ४ र ७ का कृषकहरूलाई वडा कार्यालयले नै सहजीकरण गरिदिने बुझिएको छ।

बुधबार सांकेतिक रूपमा कृषकहरूलाई हाते ट्याक्टर वितरण गर्दै भीरकोट नगरप्रमुख गोविन्द कुमार कर्माचार्यले कृषिको आधुनिकीकरण गर्न  र उत्पादन  लागत घटाउन नगरपालिकाले ट्याक्टर खरिदमा पचास प्रतिशत अनुदान दिइएको बताउनुभयो।