महिला प्रहरीलाई अभद्र व्यवहार गर्ने दुई युवा पक्राउ

स्याङ्जाको पुतलीबजार नगरपालिका –३ बाढखोलामा देउसी भैलो खेल्ने विषयलाई लिएर प्रहरीसँग विवाद उत्पन्न भएपछि दुई जना युवा पक्राउ परेका छन् ।कार्तिक ७ गते राति देउसी भैलो कार्यक्रम चलिरहेका बेला सुरक्षार्थ खटिएका प्रहरी कर्मचारीहरूसँग केही व्यक्तिहरूबीच वादविवाद भएको जिल्ला प्रहरी कार्यालय स्याङ्जाले जनाएको छ । प्रहरीका अनुसार सम्झाइबुझाइका क्रममा समेत उनीहरूले संयमित नभई महिला प्रहरीमाथि अभद्र व्यवहार गरेका थिए ।

अभद्र व्यवहार गरेको आरोपमा पुतलीबजार –३ बाढखोला बस्ने ३० वर्षीय सौगिल गुरुङ र ३२ वर्षीय सौजन गुरुङलाई पक्राउ गरिएको प्रहरी निरीक्षक प्रवेश तिवारीले जानकारी दिनुभयो  ।उनीहरू विरुद्ध अभद्र व्यवहार कसूरमा जिल्ला प्रशासन कार्यालय स्याङ्जाबाट १० दिनको म्याद थप गरी कानुनी प्रक्रिया अघि बढाइएको निरीक्षक तिवारीले बताउनुभयो  । घटनाबारे थप अनुसन्धान भइरहेको प्रहरीले जनाएको छ ।