वालिङमा अत्याधुनिक एआई (AI) प्रविधिबाट क्षयरोग परीक्षण शिविर सम्पन्न, ४५३ जना लाभान्वित

वालिङ नगरपालिकाको आयोजनामा अत्याधुनिक कृत्रिम बुद्धिमत्ता (AI) प्रविधिमा आधारित क्षयरोग (TB) स्क्रिनिङ शिविर सफलतापूर्वक सम्पन्न भएको छ। समुदायस्तरमा लुकेर रहेका क्षयरोगका बिरामीहरूको समयमै पहिचान गरी उपचारको पहुँच बढाउने उद्देश्यले २०८३ जेष्ठ २७ गते उक्त शिविर सञ्चालन गरिएको थियो। प्रादेशिक रोग नियन्त्रण केन्द्र पोखराको प्राविधिक सहयोग तथा प्रदेश जनस्वास्थ्य कार्यालयको समन्वयमा सञ्चालित यस शिविरमा वालिङ नगर क्षेत्रका विभिन्न वडाबाट आएका कुल ४५३ जना नागरिकले प्रत्यक्ष रूपमा सेवा लिएका छन्, जसमा २९९ जना महिला र १५४ जना पुरुष रहेका थिए।

शिविरमा सहभागी सम्पूर्ण नागरिकहरूको छातीको एक्स-रे परीक्षण गरी उक्त रिपोर्टलाई एआई प्रविधिमार्फत विश्लेषण गरेर क्षयरोगको सम्भावित जोखिमको मूल्याङ्कन गरिएको थियो। परम्परागत विधिको तुलनामा एआई प्रविधिको प्रयोगले छिटो, प्रभावकारी तथा गुणस्तरीय रूपमा रोगको प्रारम्भिक पहिचान गर्न ठूलो सहयोग पुगेको स्वास्थ्यकर्मीहरूले बताएका छन्। यस परीक्षणका क्रममा ४ जना नागरिकमा क्षयरोग पहिचान भएको छ। सङ्क्रमण देखिएका उनीहरूलाई थप परीक्षण तथा आवश्यक उपचार प्रक्रिया अगाडि बढाउन सम्बन्धित स्वास्थ्य संस्थामा सम्पर्क गराई आवश्यक व्यवस्थापन मिलाइएको नगरपालिकाले जनाएको छ।

यस कार्यक्रमले समुदायमा लुकेर रहेका क्षयरोगका बिरामी पत्ता लगाउन महत्त्वपूर्ण योगदान पुर्‍याएको नगरपालिकाको ठहर छ। 'क्षयरोग मुक्त समाज' निर्माणको लक्ष्य साकार पार्न आगामी दिनहरूमा पनि यस्ता नवीनतम प्रविधिमा आधारित स्वास्थ्य कार्यक्रमहरूलाई निरन्तरता दिने प्रतिबद्धता वालिङ नगरपालिकाले व्यक्त गरेको छ। साथै, क्षयरोगका कुनै पनि लक्षण देखिएमा हेलचेक्र्याइँ नगरी तत्काल नजिकको स्वास्थ्य संस्थामा गई समयमै परीक्षण तथा उपचार गराउन नगरपालिकाले सम्पूर्ण नगरवासीहरूमा हार्दिक अनुरोध गरेको छ।