भीरकोटमा अभिभावक शिक्षा र सचेतना कार्यक्रम 

धनथान सामुदायिक सिकाइ केन्द्र, भीरकोट नगरपालिका–६, स्याङ्जाको आयोजनामा अभिभावक शिक्षा, आत्महत्या दुरुत्साहन  विरूद्ध तथा साइबर अपराध सम्बन्धी सचेतना कार्यक्रम सम्पन्न भएको छ। असार १३ र १४ गते बालोदय माध्यमिक विद्यालय, सुन्दरबजारमा  सञ्चालन भएको  कार्यक्रममा अभिभावक शिक्षा, आत्महत्याको रोकथाम तथा साइबर अपराधबाट जोगिने उपायका सचेतना प्रदान गरिएको अध्ययन केन्द्रका अध्यक्ष बल बहादुर थापाले जानकारी दिनुभयो ।

कार्यक्रममा वडा नं. ६ का अध्यक्ष लक्ष्मण खत्री क्षत्रीले सामुदायिक सिकाइ केन्द्रले आत्महत्या, साइबर अपराध जस्ता समस्या समाधान गर्न एवं शैक्षिक गुणस्तर सुधार्न सचेतनामूलक कार्यक्रम गरेकोमा खुशी व्यक्त गर्नुभयो। सामाजिक समस्या समाधान र शैक्षिक गुणस्तर सुधार गर्न सरोकारवाला सबै एकजुट हुनुपर्ने उनले बताउनुभयो। 

कार्यक्रममा  प्रहरी नायब निरीक्षक हरि प्रसाद काफ्ले, प्रहरी सहायक निरीक्षक प्रकाश लामघारे तथा प्रहरी सहायक निरीक्षक पुष्कर पोखरेलले लागूऔषध दुर्व्यसनी, आत्महत्या दुरुत्साहन र साइबर अपराध सम्बन्धी कानुनी व्यवस्था, सामाजिक सञ्जालको सुरक्षित प्रयोग, साइबर ठगीका जोखिम तथा त्यसबाट बच्ने उपायबारे सहजीकरण गर्नुभएको थियो। 

त्यसैगरी,  नगर शिक्षा शाखा अधिकृत विष्णु बहादुर भट्टराई र  भोज बहादुर थापाले अभिभावक शिक्षाको महत्व, बालबालिकाको सकारात्मक पालनपोषण, पारिवारिक वातावरणको भूमिका तथा नैतिक मूल्य–मान्यता विकासका विषयमा प्रशिक्षण  दिनुभएको थियो।

कार्यक्रममा बालोदय मा.वि. का प्रधानाध्यापक अमृत अर्याल, जनसेवा आधारभूत विद्यालयका प्रधानाध्यापक निलकण्ठ खनाल, समाजसेवी रेशमप्रसाद रेग्मी,  गोविन्द प्रसाद तिवारी, स्थानीय अभिभावक, विद्यार्थी, शिक्षक समुदायका प्रतिनिधि तथा सरोकारवालाको सहभागिता रहेको थियो। सहभागीहरूले यस्ता सचेतनामूलक कार्यक्रमले परिवार, विद्यालय र समुदायबीचको समन्वय सुदृढ बनाउन तथा सामाजिक अपराध न्यूनीकरणमा महत्वपूर्ण योगदान पुग्ने विश्वास व्यक्त गरेका छन्। सामुदायिक सिकाइ केन्द्रले समुदायमा जनचेतना अभिवृद्धि गर्ने उद्देश्यले आगामी दिनमा पनि यस्ता कार्यक्रमलाई निरन्तरता दिने जनाएको छ।