उत्कृष्ट नतिजा ल्याएका विद्यार्थी सम्मानित

भीरकोट नगरपालिकाले २०८२ सालको एसईई परीक्षामा उत्कृष्ट नतिजा प्राप्त गरेका दुई विद्यार्थीलाई सम्मान गरेको छ। शहिद शुक्र मा.वि. का नितेश काफ्ले र दहथुम मा.वि. का चाहना के.सी. लाई नगरपालिकाले नगद पुरस्कारसहित सम्मान गरेको शिक्षा शाखा प्रमुख खड्ग बहादुर रानाले जानकारी दिनुभयो।

शहिद शुक्र मा.वि. का काफ्लेले एसईई परीक्षामा ४ जिपिए र दहथुम मा.वि. का  चाहना के.सी. ले ३.९१ जिपिए प्राप्त प्राप्त गर्नुभएको थियो।  काफ्लेलाई नगद पुरस्कार १५ हजार रूपैयाँ र के.सी. लाई १० हजार प्रदान गरिएको शिक्षा शाखाले जानकारी दिएको छ।

नगर उपप्रमुख भगवती रेग्मी अर्यालले भीरकोट नगरपालिका भित्र सर्वोत्कृष्ट नतिजा ल्याउन सफल छात्र र छात्रालाई सम्मान गरिएको बताउनुभयो। उहाँले भन्नुभयो, " सामुदायिक विद्यालयका विद्यार्थीले सर्वोत्कृष्ट नतिजा ल्याउदा हामी खुशी छौं। उत्कृष्ट विद्यार्थीको हौसला बढाउन नगरपालिकाले सम्मान गरेको हो।"

शहिद शुक्र मा.वि. का प्रधानाध्यापक चोलाकान्त काफ्लेले नितेश सानैदेखि पढाइमा अब्बल, जिज्ञासु र मिलनसार स्वभावको भएको बताउनुभयो। उहाँले भन्नुभयो, "नितेश बहुमुखी प्रतिभा भएका एक असल छोरा र हाम्रो विद्यालयका उत्कृष्ट विद्यार्थी हुन्।" प्रअ काफ्लेका अनुसार नितेशले कक्षा १ देखि १० सम्म सामुदायिक शहिद शुक्र मा.वि. मा नै पढ्नु भएको हो।

दहथुम मा.वि. बाट उत्कृष्ट नतिजा ल्याउने विद्यार्थी चाहना के.सी. ले कक्षा ९ र १० मा मात्रै सामुदायिक विद्यालय पढ्नुभएको हो। ८ कक्षाको वार्षिक परीक्षा दहथुम मा.वि. बाट दिनुभएकी उहाँले कक्षा ८ सम्म बालज्योती अंग्रेजी आवासीय मा.वि. बयरघारीमा पढ्नुभएको थियो।