स्याङ्जा–२ (क) को सभापतिमा लक्ष्मण अधिकारीको उम्मेदवारी

नेपाली कांग्रेस भीरकोटका निवर्तमान सभापति तथा वडा नं. ५ का पूर्व वडाध्यक्ष यामप्रसाद अधिकारी ‘लक्ष्मण’ ले नेपाली कांग्रेस स्याङ्जा क्षेत्र नं. २ (क) को सभापति पदमा उम्मेदवारी घोषणा गरेका छन्।

सामाजिक सेवा, मानवीय सहयोग र संगठन निर्माणमा लामो समयदेखि सक्रिय अधिकारीले आफ्नो उम्मेदवारीलाई संगठन सुदृढीकरण, कार्यकर्ताबीचको समन्वय र जनतासँगको सम्बन्ध थप मजबुत बनाउने अभियानका रूपमा अघि सारेका छन्।

२०७२ सालको विनाशकारी भूकम्पदेखि बाढी–पहिरो, विपन्न परिवारको सहयोग तथा कोभिड–१९ महामारीसम्मका विभिन्न संकटमा राहत तथा सहयोगका गतिविधिमा अधिकारी सक्रिय रहँदै आएका छन्। महामारीका कठिन समयमा औषधि, अक्सिजन तथा खाद्यान्न व्यवस्थापनमा समेत उनी संलग्न रहेको बताइन्छ।

लायन्स क्लब, जेसिजलगायत सामाजिक संस्थामार्फत समेत मानवीय सेवामा सक्रिय अधिकारीले व्यक्तिगत अवसरलाई समेत सामाजिक सेवासँग जोड्दै आएको दाबी गर्दै आएका छन्। आफ्नो जन्मदिनमा विपन्न परिवारलाई सहयोग गर्ने अभ्यासलाई उनले निरन्तरता दिँदै आएको बताइन्छ।

राजनीतिक रूपमा भने अधिकारीले संगठनभित्रको समन्वय, विवाद व्यवस्थापन र तल्लो तहसम्म संगठन विस्तारलाई आफ्नो प्राथमिकतामा राखेका छन्। भीरकोटमा सभापतिको जिम्मेवारी सम्हालेको अनुभवलाई क्षेत्रीय संगठन निर्माणमा उपयोग गर्ने उनको दाबी छ।

अधिकारीको उम्मेदवारीसँगै स्याङ्जा क्षेत्र नं. २ (क) को नेतृत्वका लागि हुने प्रतिस्पर्धा थप चासोको विषय बनेको छ। उनीसँग स्थानीय तहको नेतृत्व, पार्टी संगठन सञ्चालन तथा सामाजिक क्षेत्रमा काम गरेको अनुभव रहेको छ।

“पदभन्दा संगठन र संगठनभन्दा जनता” भन्ने मान्यतालाई अघि सार्दै अधिकारीले कार्यकर्ताको भावनालाई केन्द्रमा राखेर पार्टीलाई थप व्यवस्थित, गतिशील र जनतामुखी बनाउने प्रतिबद्धता व्यक्त गरेका छन्।

अब उनको उम्मेदवारीले क्षेत्र नं. २ (क) मा नेपाली कांग्रेसको आन्तरिक राजनीतिक समीकरणमा कस्तो प्रभाव पार्छ भन्ने विषय आगामी अधिवेशनसँगै स्पष्ट हुँदै जानेछ।